-Almmuhus-
KULTUVRAGealdagasas ovdal CD almmuheami

Gealdagasas ovdal CD almmuheami

-

-

Soai leaba goappašagat hárjánan artisttat, muhto ovttas eaba leat čuojahan beare guhká. Arvvas almmuha iežas vuosttaš skearru Riddu Riđu festiválas bearjadaga.

Arvvas joavkku juoigi Sara Marielle Gaup ja čuojaheaddji Steinar Raknes mearrideigga ovdal beassážii gárvet iežaska skearru geassái, dál lea «Remembrance» gárvvis ja CD:a almmuhuvvo bearjadaga. Dá lea Arvvas joavkku vuosttaš skearru.
 – Mun lean guhká illudan dása. Ovtta gaska ean orron geargamin CD:in dássážii, muhto dál šaddá hui somá almmuhit dan, lohká Sara Marielle.

Guokte beakkálmasa

Goappašagat Arvvas-duos leaba beaggán sihke Sámi ja máilmmi musihkkamáilmmis. Sara Marielle Gaup barggai guhkás ovttas Lawra Sombyn dovddus Adjágas joavkkus ja Steinar Raknes ges ovttasbarggai luohtedronnegin Inga Juuso rohkiin Skáidi joavkkus. Arvvas čuožžilii maŋŋel go Sara Marielle lei leamašan Iŋggá sadjásažžan Skáiddi joavkkus. Go Iŋgá vádjolii diimmá geasi, de lei son bidjan vuođu ođđa ovttasbargui gaskal Sara Marielle ja Steinara.

Loga maid: Arvilis Arvvas

Ruovttoluotta nuorravuhtii

Guovdageaidnulaš Sara Marielle Gaup lea bajásšaddan bearrašis ja birrasis gos lea gullan ja oahppan juoigat mánnávuođa rájes. Son álggii nuorran guoimmuhišgoahtit lávddi alde ja govviduvvo nanu juoigin. Sutnje lea Riddu Riđđu lávdi hui erenomáš go das lea máŋgii juoiggastan nuorravuođa rájes. Danin heive ge bures almmuhit ođđa skearru álgoálbmotfestiválas mii lágiduvvo Olmmáivákkis dán vahkkus.

 – Jáhkkán ahte šaddá hui somá go Riddu Riđu lávdi lea munnje hui erenomáš. Riddu Riđu lávdi lea mu dahkan duostilin ja hástalan mu dahkan dan maid muđui in lean duostat, čilge Gaup.

Gelddolaš

Sara Marielle Gaup lea juoigi, muhto Arvvas joavkkus lea maiddái lávlugoahtán. Steinar Raknes ges lea okta Norgga čeahpimus kontrabassistačuojaheddjiid, son lea maiddái vokalista ja lávlladahkki. Son lea ovddidan Norgga jazzmusihka maŋimuš 20 jagi ja lea čuojahan eanaš njunuš jazzfestiválain Europas. Arvvas juoigá ja lávlu sihke eŋgelas- ja sámegillii, musihkka ja dajahusat doarjuba ja lokteba nubbi nuppi. Musihkka lea šuoŋalaš, bealljáičuohcci ja čaffat.

 – Letne hui gealdagasas oaidnit mo olbmot váldet musihka vuostá, ii dát leat nu dábálaš seaguhus, lohká Sara Marielle Gaup.

Guossejuoigit

Go Arvvas joavku čuojahii Romssa gávpogis guovvamánus, de lei Sara Marielles oabbá mielde lávddi alde. Son čilgii dalle Ávvirii ahte dáhtošii maiddái boahtte áiggis eará guossejuigiid searvat konsearttain. Sara Marielle lea oainnat hárjánan earáiguin ovttas ovdanbuktit luođi. Son lea earret eará olu juoigan fárrolágaid Lawra Sombyn ja iežas áhčiin ja oappáiguin.

 – Munnos leat maiddái dál lávddis mielde veahkkejuoigit muhtin šuoŋain. In háliit vel almmuhit geat sii leat, loahpaha Gaup.

-Almmuhus-