-Almmuhus-
OĐĐASATGeainnus ii vuhtto mihkke

Geainnus ii vuhtto mihkke

-

-

Biila mii vujii eret geainnus Idjajávrri lulábealde Kárášjoga gielddas odne iđđes lea buot moallun, muhto liikká eai sáhte politiijat vuohttit guđe guovllus biila lea boahtán.

Nuorta-Finnmárkku operašunjođiheaddji  Finnmárkku politiijaguovllu nuorttabeale operašuvdnajođiheaddji Torfinn Halvari sáhttá dál muitalit, ahte biilalihkohisvuođas Idjajávrris, Kárášjoga gielddas, leigga biillas badjel 20-jahkásaš nissonolmmoš ja badjel 40-jahkásaš dievdoolmmoš.

– Dađi eambbo dieđut eai leat vuos mis, ja lea álot dainna lágiin ahte mii diktit politiijaid geat leat báikkis, ráfis bargat dákkár lihkohisvuođain. Eat dieđe ge man garrasit leaba roasmmohuvvan, eará go ahte goappašagat leaba Sea-King helikopteriin dolvojuvvon Hámmárfeastta buohccevissui, dadjá Halvari.

 

Nissonolmmoš garraseappot roasmmohuvvan

Ávvir humai  Kárášjoga politiijain Arvid Næssin, gii lei lihkohisvuođabáikki jođiheaddji, ovdalaš go dolvo roasmmohuvvan olbmuid helikopterii mii lei seivon luotta ala.
– Dál eat vuos sáhte dadjat eará go ahte biila lea vuodján eret geainnus, biillas ledje guokte olbmo geat guktot leaba roasmmohuvvon. Nissonolmmoš lea garraseappot roasmmohuvvon, muhto eat leat ožžon vel makkár ge dieđu man garrasit, dajai Næss.

(Ášši joatka gova vuolde)


Sea-King loktana lihkohisvuođabáikkis.
Govven: Josef Isak Utsi

Ávvir reportar gii lei báikkis muitala ahte dievdoolmmoš oidnui ieš vázzime ambulánsii.

 

Asfálttas ii vuhtto mihkke

Politiijat eai dieđe guđe guovllus biilla lea boahtán, go asfálttas eai vuhtto makkár ge deahkkaluottat. Liikká lea álki oaidnit ahte leat leamaš garra fámut jođus, go biilla lea buot moallun ovddabealde ja iešguđet lágan dávvirat leat girdán biillas olggos.

(Ášši joatka gova vuolde)


– Eat dieđe vuos guđe guovllus biila lea boahtán, go asfálttas ii vuhtto mihkke. Danne eat dieđe ge boahtá go Kárášjoga vai Leavnnja guovllus,  dadjá Næss.

Næss lea maŋŋel go Ávvir jearahalai su muitalan NRK Sápmái ahte várohit ahte vuoddji ii soaitte čielggus leamašan ja maid ahte lea doallan alla leahtu biillan.

Dál lea johtolat fas rahppon meaddel lihkohisvuođabáikki.

 

-Almmuhus-