Stáda geaidnodoaimmahat dieđiha ahte leat iskamin guovllu gos eanauđas fierai ja ahte geainnu rahpet áramusat gaskavahkku.
Stáda geaidnodoaimmahat dieđiha ahte leat iskamin guovllu gos eanauđas fierai ja ahte geainnu rahpet áramusat gaskavahkku.
Lávvardatija firre eanauđđasat Reaššegeažis, Ráissa suohkanis, Romssa fylkkas. Ii okta ge váldon uđđasis, muhto máŋggas geat ásset guovllus gárte guođđit ruovttuideaset. E6:š geaidnu leamaš gitta dan rájes.
– Mii leat álggahan bohkat eatnama guovllus ja ihkku álggahit barggu iskat lea go uđas váikkuhan mearrabotni. Báikái leat maid diŋgon mobiilarádára mii dieđiha jus eanan lihkasta guovllus, čilge Stáda geaidnodoaimmahaga ossodatdirektevra Rigmor Thorsteinsen preassadieđáhusas sotnabeaivvi eahkeda.
Loga maid: Eanauđđasis šadde evakueret
Gártet birra vuodjit
Stáda geaidnodoaimmahat ávžžuha mátkkošteddjiid vuodjit Suoma ja Guovdageainnu bokte dan botta go geaidnu lea gitta. Sis lea guovllus geaidnobargu ja danin gávdnojit buot resursat lahkosis kártenbargui.
– Min bargu lea vuosttamužžan rahpat E6:š geainnu nu jođánit go báiki lea sihkkarastojuvvon. Min geaidnoprošeavtta geažil leat mis guovllus fágaolbmot ja geoteknihkalaš rusttegat mat geavahuvvojit kárten barggus, dadjá Thorsteinsen.
Odne iđđes guorahallet mannan ija iskkademiid ja iđitbeaivvi almmuhit ođđaseamos dieđuid.
