Badjel bealli Norgga doaresbeale biilavuoddjiin oaivvildit ahte iežaset guovllu geainnut leat nu hejot fuolahuvvon. – Olbmot vásihit beaivválaččat ahte politihkkárat eai vuorut daid geainnuid. Dan háliidit olbmot rievdaduvvot, lohká NAF, Norgga Automobiillalihtu preassahoavda Ingunn Handagard.
Mađe eambbo doaresbealde olbmot ásset, mađe fuonibun árvvoštallet olbmot geainnut leat. Riikadásis vástidit 34 proseantta ahte sin beaivválaš geainnut leat bures fuolahuvvon. Doaresbeale guovlluin lohket 58 proseantta ahte sin guovllu geainnut leat funet fuolahuvvon. Dan čájeha ođđa iskkadeapmi man Norstat lea dahkan NAF ovddas geassemánus. Sii leat oktiibuot jearahan 1103 olbmo mo sin mielas lea geaidnu gos sii ásset. Doaresbealde Norggas vástidit 55 proseantta ahte geainnuin ii leat dohkálaš standárda johtolaga ektui.
Háliidivčče vuoruhit áimmahuššama
Golmmas njealji olbmos vástidit ahte sii háliidit ahte politihkkarat vuoruhivčče geaidnoáimmahuššama. 37 proseantta háliidivčče ođđa geainnuid.
– Divvut geainnuid Norggas mávssášii birrasii 100 miljárdda. Mii oaidnit čielgasit ahte heajos geainnut váikkuhit olbmuid eallimii, lohká Handagard preassadieđáhusas.
NAF analysat čájehit ahte birrasii njealjádasoassi fylkkageainnuin leat menddo seakkit dan ektui mii galggašii leat standárda jus ráhkadivčče daid dál. Olu riikageainnuin váilu gaskasárggis.
– Geaidnostandárda lea govssahallan johtolatovdáneapmái. Mii dárbbašat vuoruhit geaidnoáimmahuššama ja ođasmahttima. NAF lea fuolastuvvan go geaidnobušeahtat goazadit dan vuoruheami, lohká Handagard.
Lohpidan áimmahuššat geainnuid
Hurdalsplattformen julggaštusas lohpidii ráđđehus kártet man olu divvumiid riika- ja fylkageainnut dárbbašit ja hábmet áimmahuššanplána. NAF doarju dan, muhto ohcala das eanet áŋgiruššama.
– Ii leat doarvái dušše divustit, ulbmil ferte leat buot ođasmahttit ja áimmahuššat. Dás lea sáhka govddidit geainnuid, gaskasárgá merket, čorget geaidnoravddaid ja sihkkarastit uđđasiid vuostá, lohká Handagard.
Mii lea guovddáš ja doaresbeale guovlu lea dahkkon SSB, Statihkalaš guovddášdoaimmahaga indeaksa mielde, Guovddášguovlu Oslo ja stuorra gávpogat máddin (kategoriija 1) ja Rivttát ja Loabát (kategoriija 6).
