Dál áigu Stáhta geaidnodoaimmahat cegget sámegiel geaidnogalbbaid, nu mo guhká leat galgan.
Dál áigu Stáhta geaidnodoaimmahat cegget sámegiel geaidnogalbbaid, nu mo guhká leat galgan.
– Mii čuovvolat dán jođáneamos lági mielde, lohká Stáhta geaidnodoaimmahaga johtolathálddašeami ossodatdirektevra Jacob Trondsen NRK Sápmái.
Dássážii lea eanaš galbejuvvon dušše dárogilli Norgga gielddain, vaikke sámegielat maid leat almmolaš gielat Norggas.
Geaidnodoaimmahagas eai dieđe man olu sámegielgalbbat váilot, dahje olu šaddá máksit njulget dán boasttuvuođa.
Mieđihit meaddán
Láhka lea čielggas, sámi ja kvena báikenamat galget geavahuvvo kárttain ja geaidnogalbbain.
Báikenammalága 9. paragráfa, mas lea sáhka báikenamma geavaheamis, cealká ahte sámi ja kvena báikenamat maid báikkálaš olbmot geavahit, dahje mat ealáhusaid geažil leat cieggan báikái, galget almmolaččat geavahuvvot kárttain, galbbain ja registariin, vejolaččat sáhttá dárogielnama maid geavahit.
Geaidnodoaimmahat mieđiha ahte leat boastut bargan jahkeviissaid sámegielgalbema dáfus.
Sii leat duvdán gielddaide mearridit galget go báikenamat galbejuvvot sámegillii, ii ge dat leat de dahkkon.
– Dál ráhkadat njuolggadusaid. Dasto diŋgot galbbaid ja šiehttat entreprenevrraiguin mat galget cegget galbbaid, nu ahte veahá gal ádjánit, lohká Trondsen.
– Stuorra vuoitun
Lea stuorra vuoitun sámegielaide go geaidnodoaimmahat šálloša ja váldá ovddasvástádusa, oaivvilda sámediggeráđđelahttu Lars Filip Paulsen.
– Dát lea ovdáneapmi. Mii beassat dál oaidnit sámi báikenamaid «lieđđumin», lohká Paulsen.
Son lasihastá ahte ii galgga badjelgeahččat dan stuorra persovnnalaš mearkkašumi mii dás lea sápmelaččaide, go besset iežaset báikenamaid oaidnit oidnosis almmolašvuođas.
Šállošit
Stáhta geaidnodoaimmahagas šállošit go eai leat galben nu mo livčče galgan.
– Dát ii leat dohkálaš ja dan mii šállošat. Sáhttá orrut dego eat leat čuvvon lága njuolggadusaid ja ulbmila, lohká Trondsen.
Son bivdá gielddain veahki gávnnahit makkár báikkiid galget galbet.
