Mannan vahkoloahpa deattuhii Folkehelseinstituttet (FHI) dahje Álbmotdearvvašvuođainstituhtta eavttuid geain berrešii iskat koronavirusa njoammudávdda ektui.
Trøndelága fylkkamánni lea sádden Álbmotdearvvašvuođainstituhta preassadieđáhusa ahte njoammudávdda suodjalandoaibmabijut mat leat biddjon, leat gáhtten dihtii riskkajoavkkuid ja geahpedit dearvvašvuođabálvalusa noađi. Dán vuođul lea ge iskaneavttut mearriduvvon.
Sihkarastin dihtii dearvvašvuođaresurssaid ja iskannávccaid buoremus láhkai, de deattuha Álbmotdearvvašvuođainstituhta ahte olbmuin geain eai leat dávdamearkkat, eai galgga iskojuvvot.
Viidásat deattuhuvvo ahte dearvvašvuođabargit geain leat láivves dávdamearkkat, sáhttet vuordit guokte jándora ovdal go iskojuvvojit covid-19 ektui. Olbmot geat gullet hearkkes jovkui lea maid buorebut čilgejuvvon.
Geasa galgá vuoruhit iskama?
Álbmotdearvvašvuođainstituhta oaivvilda dáid joavkkuid berre vuoruhit:
Sis geain lea fáhkka vuoiŋŋahatbohccivuolši oktan feberiin, gosset dahje eai baljo nagot rohttet vuoiŋŋahaga ja geain lea seammás: Geas lea dárbu beassat buohccivissui. Lea pasieanta dahje ássá dearvvašvuođainstitušuvnnas.
Bargá dearvvašvuođabálvalusas njuolga pasieanttaiguin. Dán joavkku sáhttá árvvoštallat berre go sin iskat láivvibut fáhkka vuoiŋŋahatbohcci dávddamearkkain mat leat bistán guhkit go guokte jándora (dan botta go lea ruovttus).
Gii lea 65 jagi boaris ja geas lea bistevaš dávda (nu mo váibmodávda, sohkardávda, bistevaš geahpesdávda, borasdávda ja alla varradeaddu). Lea guoskan olbmui geas lea duođaštuvvon korona-virusa njoammudávda, covid-19. (Jus eai leat doarvái olbmot, de ii dárbbaš dán joavkku vuoruhit).
