Lea dieđihuvvon muohttaga ja gálja geainnuid miehtá riika. Dáhkádusfitnodat muittuha heivehit leavttu siivvu mielde.
– Vásáhusaid vuođul diehtit ahte olu johtolatlihkohisvuođat dáhpáhuvvet vuosttaš čakčabeivviid go lea gálja. Olu lihkohisvuođat dáhpáhuvvet go biilavuoddjit eai heivet leavttu siivvu mielde. Lea dehálaš vuolidit leavttu, doallat buori gaska biilii mii lea ovddabeale ja muitit ahte goazastanguhkkodat lea guhkit go lea gálja, dadjá bártehoavda mohtorfievrruide Andrea Lervik Lystad Codan Forsikringas.
Iskka dálvedeahkaid
Jieŋa ja muohttaga alde lea dehálaš geavahit dálvedeahkaid, ja deahkaid minsttarčikŋodat galgá leat unnimusat 3 mm. – Gollan deahkat leat heajut ja addet guhkit goazastanguhkkodaga. Danin lea dehálaš iskkat minsttarčikŋodaga dálvedeahkain ovdal go bijat daid, dadjá Lystad.
Norggas ii leat bággu geavahit biika- dahje dálvedeahkaid, muhto dus galget álo deahkat mat leat heivehuvvon siivui. Jos dus leat dálvedeahkat main leat biikat, de lea váldonjuolggadus ahte sáhttet bidjot biilii golggotmánu 15. beaivvi rájes Nordlánddas, Romssas ja Finnmárkkus ja reasta riikkas skábmamánu 1. beaivvi rájes, jos siivu ii dagat ahte berrejit leat alde árat.
Vihtta ráđi gálja siivvus
Geahča dálkki ja siivvu. Árvvoštala galggat go diktit biilla čuožžut. Geahpet fártta ja heivet siivvu mielde. Doala buori gaska biilii mii lea ovddabeale ja luoitte vuddjiid meattá mat leat beare lahka du biilla. Jos dus lea buorre sadji birra de lea gávvil iskat goazasteami, vuoi beasat árvvoštallat man gálja lea. Fuolat ahte deahkat leat heivehuvvon siivui ja fuolat ahte leat mielde dorvoreaiddut biillas.
