Geaidnopolitiijat leat dárkkistan johtolaga máŋgga sajis mannan vahkkoloahpa. Alimus leahttu lei 139 km diimmus, ja vuoddji ii lean áigon bisánit geaidnopolitiijaide álggos.
Geaidnopolitiijat leat leamaš Kárášjogas lávvordaga iđđedis ja dárkkistan promilla 25 biilavuoddjiis. Ii oktage biilavuoddji lean gárrenoaivvis dain geaid dárkkistedje.
Maŋŋelaččat seamma beaivvi ledje geaidnopolitiijat Deanus, gos de dárkkistedje makkár leahttu lea johtolagas. Báikkis gos lea 80 leahttorádji, ledje njealjis geat fertejit máksit sáhku go lei badjelmeare alla leahttu. Alimus leahttu mihtiduvvui 103 km diimmus.
Maiddái ovtta eará biilavuoddjis lei hui alla leahttu, ja mihtidedje 118 km diimmus báikkis go rádji lea 80 km diimmus rádji. Sus válde eret vuodjinkoartta.
Geaidnopolitiijat bissehedje maid ovtta mohtorsihkkelvuoddji Deanus gii vujii 139 km diimmus lávvordaga. Son geahččalii báhtarit eret geaidnopolitiijain, muhto válljii loahpas bisánit. Geaidnopolitiijat leat duoguštan sihke vuodjinkoartta ja mohtorsihkkela.
Seidas čađahuvvui maid leahttodárkkisteapmi sotnabeaivvi čuovganeapmái. Ii lean ovtta ge biillas beare alla leahttu.
Guovdageainnus leat politiijat maid bissehan muhtin dievddu gii lea badjelaš 40-jahkásaš go navde su vuodjan gárrenoaivvis lávvordateahkeda, ja leat váldán varraiskosa sus.
Dáhpáhusat leat dieđihuvvon Finnmárkku politiijaguovllu Twitterkanálas.
