Deanučázádaga bajimuččat čoahkkanit dán vahkkoloahpa Avvilii gos geahčadit earret eará guolástanláhkaásahusa.
Deanučázádaga Guolástanhálddahus ja stivra dollejit dán vahkkoloahpa Avvilii. Sis lea čoahkkin ja juovlabeavdi doppe. Deanučázádaga Guolástanhálddahusa (DG) ráđđeaddi, Narve Stubbraaten Johansen, muitala ahte lea jahkásaš čoahkkin.
– Dán čoahkkimis galgat earret eará digaštallat guolástanláhkaásahusa rievdademiid ja luossareiveáššiid, dadjá Johansen.
Gieskat lea Ávvir čállán heajos luossajagi birra. Johansen ii loga dan leat fáddán čoahkkimis go bargojoavku ii leat vel geargan iežas bargguin.
– Dieđusge gal liikká ságastit dan birra, dadjá Johansen.
