Beanadoallolága hálddahusovddasvástádus sirdojuvvui stáhtaráđis Justiisadepartemeanttas Eanadoallo- ja biebmodepartementii njukčamánu vuosttaš beaivvi.
Eanadoallo- ja biebmodepartemeanta dieđiha preassadieđáhusas, ahte álggaha dál barggu dárkkistit beanadoallolága mii bođii fápmui 2004:s, nu mo Stuorradiggi lea dáhtton.
Beanadoallonjuolggadusat leat dehálaččat sihke beanaeaiggádii ja earáide. Lea árvaluvvon ahte Norggas leat birrasii 560 000 beatnaga.
Beatnatlágas lea čielga sihkarvuođa oassi maid lea dehálaš fuolahit. Seammás galgá maid beatnagiid ja beanaeaiggádiid riektesuodjalus maid fuolahuvvot.
Eanadoallo- ja biebmodepartemeanta bovdii ge sierra čoahkkimii gullat maid olbmot ja searvvit oaivvildit ja makkár hástalusat leat čadnon lága hálddašit.
Das besse iešguđet searvvit ja organisašuvnnat buktit oaiviliiddiset, ovdamearkka dihtii Norsk Kennel Klubb (NKK), Norsk Sau og Geit, Den Norske Veterinærforening, Norges Blindeforbund, Norges Jeger- og Fiskerforbund, ja nu ain.
