Sotnabeaivvi álgá TV-akšuvdna masa lea stuorra beroštupmi, sihke positiivvalaččat ja negatiivalaččat.
Dán jagi TV-akšuvnnas čogget ruđa WWF (World Wide Fund for Nature). Dát máilmmi viidosaš birasorganisašuvdna áigu dán jagi TV-akšuvnna ruđaid bidjat máilmmiábiid plastihkkabázahusaid čorgemii. TV-akšuvdna álgá golggotmánu 18. beaivvi ja ruđat čoggojit digitálalaččat digitálagievdnái. Koronadili dihte lea NRK mearridan dán jagáš TV-akšuvdnii čoaggit ruđa digitála čovdosiiguin.
Vuosteháhku
Dán jagáš TV-akšuvdna ii leat dušše bures váldon vuostá. Dat lea maid dagahan garra digaštallamiid ja olu gielddat leat dieđihan ahte eai áiggo searvat dahje doarjut dán jagáš akšuvnna. Sii geat áigot boikohttet, ja ávžžuhit maid earáid boikohttet dán jagáš TV-akšuvnna, eai leat mielas ahte doarjut dahje čoaggit ruđa WWF birasorganisašuvdnii. Duogážin dasa lea earret eará dan birasorganisašuvnna boraspiriid ja fállebivddu politihkka.
Muhtumiin fas lea vuosteháhku doarjut organisašuvnna mii sin mielas garrasit bargá seailluhit boraspiriid mat leat stuora vahágin sin ealáhussii. Boazobargi ja Guovddášbellodat ávžžuhedje gieskat boikohttet dán jagáš TV-akšuvnna
WWF organisašuvnna ovddasteaddjit eai mieđit čuoččuhusaide ja oaivvildit vuosttaldeddjiid ballu lea boasttu dieđuid ja ipmárdusa vuođul šaddan.
Ruhtavallji
Birrasii 7000 eaktodáhtolačča servet digitálačoaggimii. Leat iešguđet searvvit, fitnodagat, eaktodáhtolaš organisašuvnnat ja priváhta olbmot. Dat leat jo rahpan sierra digitálagivdnii «Spleis» bokte. Lávvordaga lei jo čoggon 45 270 603 ruvnnu doarjjan.
Dás gavnnat dieđuid guđiin gielddain ja guđet gielddat dorjot ruhtačoaggima.
