Organisašuvdna Virke meroštallá ahte gaskamearálaččat gávppaša juohke Norgga ássi 10 7000 ruvnno ovddas juovlamánus dán jagi.
Organisašuvdna Virke meroštallá ahte gaskamearálaččat gávppaša juohke Norgga ássi 10 7000 ruvnno ovddas juovlamánus dán jagi.
Dán jagi lea juovlaruohtta sotnabeaivvi alde, nu ahte juovlamánus nidjet gávppašanbeaivvit guvttiin beivviin.
Stuorát oassi juovlagávppašeamis dahkko juo skábmamánus ja logi jagis lea juovlagávppašeapmi skábmamánus lassánan mottiin proseanttain.
– Black Friday ja neahttagávppašeapmi lea rievdadan min juovlagávppašanvieruid, lohká Bror William Stende, Virke Faghandel direktevra NTB preassadieđáhusas.
Stoahkanhearvavuovdit sáhttet mojohallat
Diimmá logut čájehit ahte gávppašeapmi juovlamánus lea 30 proseantta eanet go gaskamearálaččat jagis.
Earenoamážit sii geat vuvdet stohkosiid, diimmuid, golliid ja girjjiid besset bures mojohallat go vuvdet beali eanet go dábálaččat jagis.
– Skábmamánu juovlagávppašeami lassáneami sáhttádat váikkuhan go mii gávppašišgoahtit juovlaskeaŋkkaid buoret áiggis dál. Neahttagávppašeapmi lassána ja olbmot háliidit sihkkarastit ahte gálvvut ollejit buori áiggis. Seammás lea gávppašeapmi juovlamánus ain stabiila ja lea ain dat deháleamos mánnu Norgga gávpeealáhusas, lohká son preassadieđáhusas.
10 710 ruvnno juohke norgalačča nammii
Gaskamearálaččat mii gávppasit 10 710 ruvnno ovddas juovlamánus. 4460 ruvnno geavahit biebmorámbuvrras ja 6250 ruvnno geavahit eará rámbuvrrain.
Mii geavahit 20 proseantta eanet biebmorámbuvrras juovlamánus go eará mánuin.
– Juovlamánnu lea dakkár mánnu goas mii herskostallat eanet go dábálaččat ja oallugat vurdet goas juovlabiebmu boahtá rámbuvrraide, lohká Ingvill Størksen, Virke Dagligvare direktevra NTB preassadieđáhusas.
Borrat eanet kvalitehtabiebmu juovllaid áigge
– Earenoamáš huššá biebmorámbuvrrain lea maŋemus vahkku ovdal juovllaid. Mii bovdet gussiid ja oastit eanet kvalitehtabiepmu juovlamánus. Oallugiidda lea dehálaš ahte juovlabiebmu addá mánnávuođamuittuid ja ahte leat árbevirolaš biepmut mat bohtet báikkálaš gávppiin. Dál leat eanet báikkálaš biebmobuvttadeamit rámbuvrrain mat buktet sihke boares muittuid olbmuide ja juovladovddu, lohká Størksen.
Sihke juovlabeahci ja sáttogáddi
Olu norgalaččat vulget juovllaid mátkkoštit.
Virke Reisepuls loguid mielde vulget 40 proseantta mis lupmui juovllaid áigge dán jagi, mii lea lassáneapmi diimmáža rájes. 16 proseantta mátkkiin mannet olgoriikii.
– Beaivvádat ja geassi geasuha juovllaid maid. Goitge jáhkán oallugiid leat juovlaruohta ruovttus ovdal go de vulget liekkariikii, lohká Sverre McSeveny-Åril, Virke Reise Utland direktevra.
– Juohke logát olmmoš dieđiha ožžon mátkki skeaŋkan dan maŋemus jagis. Oktasaš mátki sáhttá leat buorre vuohki ovttastahttit skeaŋkka ja oktasaš vásáhusaid, loahpaha son.
