Stáhta áibmojohtolatlihkohisvuođaid lávdegoddi lea dál buktán iežaset čilgehusa lihkohisvuhtii mas 57-jahkásaš NRK-redaktevra Morten Ruud duššai mannan geasi.
– Lei garra arvi, bieggaroasut ja turbuleansa. Lassin unnán girdivuodjinhárjáneapmái, leat dat sivat lihkohisvuhtii, celket raporttasteaset.
Lávdegoddi jáhkká girdivuoddji massán stivrejumi go unnui leahttu seammás go bođii bieggaroassu. Nu lea jáhkkimis jorragoahtán ja gahččan juvvii. Sii maid leat gávnnahan ahte plánen ja čađaheapmi ii lean doarvái buorre.
Eai ovddit rávvagiid
Lihkohisvuohta dáhpáhuvai suoidnemánu 21. beaivvi dán jagi, 20 km nuorttabealde Gilbbesjávrri Suomas, golmma riikka ráji guovllus. Girdis ledje guokte olbmo, jođus Leavnnjas Stájggoi Nordlándii. Nubbi olmmoš, gii lei fárus dán girdis, roasmmehuvai dušše geahppasit.
Lávdegoddi ii ovddit makkárge sihkarvuođarávvagiid dan oktavuođas, muhto eaktudit ahte Norsk Luftsportforbund atná dán raportta viidáset sihkarvuođabargguin.
(Gáldu: NTB)
