Bearjadaga dieđihuvvui ahte guovttis leigga láhppon meahccái go eaba lean joavdan márkanii. Sudno skuter lei billahuvvan, ja leigga náđđon bulkora vuollái.
Ledje eaktodáhtolaš ohcanveahkit geat gávdne áhči ja bártni. Sudno skuter lei bisánan Njoammelčerrui go leigga jođus siiddas Kárášjoga márkanbáikái, dieđihii Finnmárkku politiijaguovlu Twitteris.
– Dat manai bures. Báikkis ii sáhttán riŋget gosage ja fertiime náđđut. Munnos lei bulkor ja govččas man vuollai leimme náđđon, ja ledje biktasat ja oađđenseahkka mielde, lohká áhčči Mathis Áilu Eira Meløy Ávvirii lávvordatiđit.
Vuordán 10-11 diimmu
Son lea ilus go gávdnuiga, ja jáhkká ahte livččiiga bures birgen ija badjel báikkis ovdal niesti lei nohkagoahtit. Eira Meløy muitala ahte soai leigga vuordán birrasiid 10-11 diimmu báikkis ovdal go gávdnuiga.
– Leimme min siiddas barttas leamaš, njuovvame giđaniesti. Lihkus ii lean buolaš, ja gánda lei movttet, lohká Meløy ja dadjá ahte lunttažis lei reaidu mii doallá gieđaid liekkasin.
Su skuteris lei reaibma mannan, ja leigga njeallje miilla lulábealde Kárášjoga márkanbáikki.
– Mun bidjen báhkket skutera nu ahte čuovggat ledje alde, čilge Mathis Áilu. Dainna lágiin gávdne ohcanveahkit sudno seavdnjadasas.