-Almmuhus-
OĐĐASATGávdnui vázzime luoddaguoras go vujii badjel luotta gárrenoaivvis

Gávdnui vázzime luoddaguoras go vujii badjel luotta gárrenoaivvis

-

-

Ii loga muitit maide dáhpáhusas, muhto oaivvilda ahte lei muhttin eará gii vujii biillain. 

Muhttin Kárášjoga dievdu 60 jagiin lea dubmehallan Sis-Finnmárkku diggegottis go galgá leat vuodján gárrenoaivvis diibmá njukčamánus.

Almmái vujii badjel luotta gaskkal Kárášjoga ja Leavnnja, ja lei vihtan mii bođii measta njuolga maŋis gii dieđihii politiijai lihkohisvuođa birra.

Go politiijat bohte báikái, de gávdne dán albmá vázziime luoddaguoras.

 

Ii mieđit vuodján gárrenoaivvis 

Ieš ii almmái dovddás leat vuodján gárrenoaivvis, váikko varraiskkus mii váldui guokte diimmu maŋŋil čájeha 1,66 promilla.  

Dikkis son čilgii ahte son ii muitte dáhpáhusas maide, ja ahte lea muhttin gii lea vuodján su biillan ja báhtaran eret go vujii badjel luotta. 

Eai leat gávdnon duođaštusat mat čájehit ahte lea muhttin eará gii lea vuodján biillain. Almmái dubmehalai 30 beaivái giddagassii ja  20 000 ruvnno sáhkku vel lassin dasa ahte massii vuodjinlobi guovtti jahkkái.  

-Almmuhus-