Guolásteaddji Reidar Nilsen lea gávdnon jápmán. Son jávkkai merrii maŋŋel go šárka vuojui Čorgasnjárgga olggobeallái ođđajagimánus.
74-jahkásaš guolásteaddji Reidar Nilsen lea gávdnon jápmán, dieđihit Finnmárkku politiijaguovllus preassadieđáhusas.
– Politiijat leat ožžon vástádusa riektemedisiidnalaš guorahallamis mii duođašta ahte Reidar Nilsen dat gávdnui jápmán skilleduorastaga, cuoŋománu 14. beaivvi, Gáŋgaviikka gielddas.
Reidar Nilsen jávkkai merrii ođđajagemánu 9. beaivvi maŋŋel go šárka vuojui Čorgašnjárgga olggobeallái. Su bárdni, Remi Andre Nilsen (43), duššai seamma lihkohisvuođas. Su gal gávnnai ohcanveahka beaivvi maŋŋel go šárka vuojui.
Oapmahaččat leat ožžon dieđu identifiserema birra.
Reidar Nilsen jođihii Norges Fiskarlaga olu jagiid ja nammaduvvui gudnemiellahttun 2015:s go lei áŋgiruššan organisašuvnnas máŋgalot jagi.
