Politiijat ballet bohcco giksašuvvan jándora dahje vaikke guokte jándora.
Nuorta Finnmárkku politiijat ožžo mannan gaskavahku dieđu vaháguvvon bohcco birra Čáhcesullo gielddas.
– Boazu šattai heakkahuvvot dalán, lohká operašuvdnajođiheaddji Stein Kristian Hansen.
Hansen muitala vázzit gávdnan bohcco meahcis gos dábálaččat ollu olbmot vánddardit.
– Boazu lei gáskkašuvvon sihke čoavjjevuole ja čoarbbeales, lohká son.
Operašuvdna jođiheaddji Stein Kristian Hansen muitala ahte beana ii lean šat doppe go boazu gávdnui, muhto luottat ja gáskkašuvvon mearkkat bohccos čájehit ahte sáhttá leat beana mii lea fallehan bohcco.
Ávžžuha veaddit
Boazoeaiggát Aslak Niillas Smuk muitala bohcco fallehuvvon báikkis gos olbmot dávjá vánddardit beatnagiiguin.
– Mii oažžut dávjá dieđuid luovosbeatnagiid birra mat oaguhit bohccuid Čáhcesullo gielddas, dieđiha Smuk.
– Dávjá dihtet beanaeaiggádat ahte beatnagat sáhttet fallehit bohccuid, muhto liikká luitet daid luovus, lohká son ja joatká,
– lea imáš, ja čájehuvvo duođai váilevašvuođa elliidčálgui ja beroštumi fuolahit elliideaset.
– Dan bohccoeaiggát áigu dán ášši guoddalit politiijaide, loahpaha Smuk ja rávve,
– mii ávžžuhit olbmuid geain leat beatnagat, jurdilit guktii ovdal beatnagiid luitet luovus, lea áibbas dohkketmeahttun ahte eallit giksašuvvet ná.
