-Almmuhus-
-Almmuhus-
OĐĐASAT– Gávdnojit dakkárat maidda ii doaimma eará go bearráigeahčču ja boares bággu

– Gávdnojit dakkárat maidda ii doaimma eará go bearráigeahčču ja boares bággu

-

-

Dál lea ráđđeolmmái dolkan. – Verrošit buozalmasvuođajávkamiin galgá seamma váttis go eará ládje suoládit ruđa, lohká son.

Guovdageainnu suohkana ráđđeolmmái, Kent Valio, reagere go nu olu buozalmasvuođajávkan lea luomuid áigge geasset.

Diibmá duppalastui jávkan juste váldoluopmománu, seamma ládje go golbma jagi áigi dagai. 

Dál áigu geahččalit bissehit dán.

 

Gažada buot buozalmasvuođajávkamiid luomuid áigge

Valio ii loga iežas áigut gažadit buot buozalmasvuođajávkamiid, dušše daid mat bohtet luomuid áigge. 

– Dat go 30 olbmo leat eret dušše guhkitáiggejávkama geažil juohke beaivvi luopmománu dahká ahte suohkanis manná ovtta mánus duššái golmma jagi bargu. Das manaha servodat sullii 1,8 miljovnna ruvnno ja sáhttá váikkuhit dasa ahte jávkagohtet dat buorit ortnegat mat mis leat Norggas. Dat livččii oba vahát, čilge Valio Ávvirii.

 

Jearaldat lea leat go njuolggadusat čuvvojuvvon

Go nu oallugat jávket luopmománu, de sii ožžot luomu fas maŋŋel luomu.

Dat mearkkaša ahte earát šaddet nagodit bargat sin barggu maid.

Dat ii leat Valio mielas buorre.

– Mun gažadan veahá ahte leat go njuolggadusat čuvvojuvvon, go nie oallugat sáddejit buozalmasvuođadieđáhusa luomu áigge. Njuolggadusaid mielde galgá dieđihit doaktárii jus lea luomus, go jearaha buozalmasvuođadieđáhusa. Ii leat doarvái leat buohcci dahje veahá illáveaje, muhto ferte nu buohcci ahte ii beasa eret seaŋggas, namalassii ahte ii nagot luomostallatge.

Guovdageainnu Lagasradio čálii ovddemus dán birra.

 

Gulahallat bargiin

Dat maid praktihkalaččat dahket go boahtá buozalmasvuođadieđiheapmi luomu áigge lea ahte gulahallat bargiin.

Jus ii leat dohkálaš ágga dahje ii oba vástit ge, de sáddejit reivve NAV:i ahte bissehit buozalmasvuođaruđaid.

Reive lea gárvásii čállon, ii leat go nama deavdilit.

– Mun lean visot suohkanbargiid hoavda suohkanstivrra fápmudusa mielde ja NAV čilgehusa mielde lea lobálaš ja dábálaš ná dahkat eará guovlluin. Lean maid NAV bivdán ealgabivdolisttuid ja konfirmántalisttuid buohtastahttit buozalmasvuođadieđáhusaiguin.

 

Galgá leat seamma váttis go eará ládje suoládit ruđa

Vaikko dál áigot garrasa vuollái váldit sin geat verrošit, de ii leat suohkanis nu ahte ii leat lohpi leat buohcci.

– Guovdageainnu suohkanis lea lohpi leat buohcci ja danne mis leat ge dat ortnegat mat mis leat, dadjá Valio.

Go Ávvir jearrá ii go ráđđeolmmái bala bargiid rigearáskeames, de vástida ná:

– Guovdageainnu suohkanis barget eanas bargit garraseappot go oba nagodage ipmirdit, ja dahket buot maid sáhttet vai álbmot galgá oažžut nu buriid suohkanbálvalusaid go vejolaš. Jáhkán sin liikot, jus fal ii oktage vearálaš vugiiguin beasa duvdilit iežaset barggu sidjiide.

Valio lohká maid ahte verrošit buozalmasvuođajávkamiin galgá seamma váttis go eará ládje suoládit ruđa.

– Háliidan muittuhit ahte verrošeapmi bálkkáin lea ruhtasuoládeapmi. Dat geas de suoláda lea suohkanálbmogis. Mis galgá seamma váttis suoládit ruđa buozalmasvuođajávkama bokte, go suohkankássas.

 

Geahččalan eará vugiid

Suohkanis leat iešguđet vuogit maiguin barget unnidan dihte jávkama.

Muhtun ovttadagat leat bures lihkostuvvan.

– Muhto suohkanis, nu go eará sajis, gávdnojit dakkárat maidda ii doaimma eará go bearráigeahčču ja boares bággu. Daidda, geat leat rehálaččat ja čuvvot njuolggadusaid, ii váikkut dat moktege, dadjá Guovdageainnu suohkana ráđđeolmmái, Kent Valio, vel loahpas.

-Almmuhus-