Ii mannan guhká maŋŋel go ohcanakšuvdna álggahuvvui, ovdal go dieđihuvvui ahte láhppon dievdu lei gávdnon Biedjovákki guovllus.
Finnmárkku politiijat álggahedje ohcanakšuvnna sotnabeaivvi, maŋŋel go dievdu lei leamaš jávkosis vahkku. Politiija, Váldogádjunguovddáš, Suodjalus, Siviilasuodjalus, Rukses Ruossa, Norgga álbmotveahkki, ja Norgga gádjunbeatnagat oassálaste ohcanakšuvnnas. Ii mannan guhká ovdal go gávdne dievddu.
– Dievdu lei sakka váiban, galbmon ja njuoskan go gávdnui, dieđihit politiijat Twiiteris.
Bivdit cavgiledje
Muhtun bivdit ledje oaidnán dievddu luoddaguoras, dievdu lei čiehkádan miestaga duohkai. Dievdu lei mátkkis iežas bearrašiin go gáiddai eret.
