Mearradutkaninstituhtta lea gávdnan plastihka birrasii 25 proseantta iskosiin mat leat váldon Riehpovuonas Finnmárkkus.
Mearradutkaninstituhta mearradutki Terje van der Meeren dat lea gávdnan plastihka iskosiin maid leat váldán 2015 rájes. Mearradutki lea váldán iskosiid meađđemiin ja veajehiin Riehpovuonas.
– Juohke jagi leat gávdnan danlágan fiberiid iskosiin maid lean váldán, in ge leat nu olu smiehttan daid birra. Muhto dál lea biddjon nu olu fuomášupmi plastihkkafiberiidda. Danne dovddan leat dehálažžan ahte muitalan ahte lean gávdnan plastihka nu olu iskosiin, birrasii 25 proseantta iskosiin, lohká van der Meeren.
– Beare unnán guorahallan vuona birasdili
Luonddugáhttenlihttu ja Sosialisttalaš Gurutbellodat (SG) reagerejit garrasit gávdnosiidda:
– Dat leat balddihahtti gávdnosat. Muhto dat duođaštit dan maid mii leat olu jagiid juo čuoččuhan. Birasdilli Riehpovuonas lea beare hejot kártejuvvon, dadjá Luonddugáhttenlihtu Davvi-Norgga guovllučálli, Geir Jørgensen NRK:i.
SG stuoradiggeáirras Lars Haltbrekken oaivvilda ahte dáid gávdnosiid geažil berre Stuoradiggi ođđasit meannudit Riehpovuona mearradeponiija ášši, ovdal go luoitigohtet vel eanet plastihka ja nuoskkideami Riehpovutnii.
(©NTB)
