Áicavaš tuvravázzi gávnnai imaš páhka «museavuovddis» Kárášjogas.
Porsáŋggu leansmánneguovlu čállá preassadieđáhusas ahte Kárášjoga politiijat ožžo stuorebuš oasi narkotihka man muhtun tuvravázzi gávnnai guovllus man gohčodit «Museavuovdin» Kárášjogas.
Áicavaš tuvravázzi buvttii páhka politiijaide gaskavahkku miessemánu 26. beaivvi.
– Narkotihkka lea sáddejuvvon analyseremii ja vihkkemii, eatge mii háliit vuos muitalit man olu dahje makkár narkotihkka lea gávdnon. Muhto dat lea mearkkašahtti olu mii ii sáhte jurddašuvvon dušše iežas geavaheapmái, dadjá Porsáŋggu leansmánneguovllu leansmánni, Siri Ulverud, preassadieđáhusas.
Politiijat leat leamaš guovllus beatnagiin ja doppe eai navdde eambbo narkotihka.
Sihtet cavgilemiid
– Mii eat dieđe gii eaiggáduššá narkotihka, ja siđašeimmet cavgilemiid jus oktage lea vávján eahpideaddji doaimmaid Museavuovddis. Mii maid rámidat tuvravázzi guhte gávnnai narkotihka ja buvttii politiijaide. Vázzi lea veahkehan jávkadit stuorát oasi narkotihka báikegottis, dadjá leansmánni preassadieđáhusas.
Finnmárkku politiijat dutket ášši roavva narkotihkkarihkusáššin.
