Geaidnodoaimmahat gidde šalddi jus vel okta boaltu billahuvvá.
Hålogalándda-šaldi rahppui juovlamánu 9. beaivvi diibmá, ja lea Áhkánjárgga davábealde.
Geaidnodoaimmahat dieđiha ahte leat gávdnan hearkivuođa vel 12 boalttus, dain 344 boalttus mat dollet šalddi kábeliid gitta.
Okta lea jo dieđihuvvon billahuvvan.
– Ii leat várra ahte šaldi ii guotte, ja dat lea rabas johtolahkii. Šaldi sáhttá aŋkke giddejuvvot jođánit jus eambbo boalttut luitet, čilge Davi guovllu prošeaktaossodaga ossodatdirektevra Stein Johnny Johansen doaimmahaga neahttasiiddus.
Molsut boalttuid
Guovtte geardde jándoris galget iskat boalttuid dál, dieđiha Stáhta geaidnodoaimmahat.
Ultrajietnainspekšuvdna čađahuvvui mannan vahkku buot boalttuin, ja daid leat vuđolaččat iskame.
Dán vahkku čađahuvvo fas inspekšuvdna.
Dál leat geahččaleame čavget daid boalttuid nannosit ávdnasiiguin vai bissot gitta. Mihttu lea buoridit daid, dassážii go leat buvttadan ođđa boalttuid, nu ahte daid sáhttet molsut.
