Biilavuoddjit ribahit girddihit badjelmeare vaikko politiijat leat jo dieđihan ahte sii dán vahkkus dollet olu johtolatdárkkistemiid. Riehponávžžis leat politiijat sáhkkohan gávcci biilavuoddji.
Gaskkavahku maŋŋilgaskabeaivvi čađahuvvui leahttodárkkisteapmi Riehponávžžis.
Veaháš badjelaš guovttis dieđihii Finnmárkku politiijaguovlu Twitteris ahte leat gávcci biilavuoddji bissehan ja sáhkkohan go leat beare alla leahtus vuodján.
– Alimus leaktu lei 97 km/diimmus báikkis gos leahttomearri lea 80 km/d, čállá Finnmárkku politiijaguovlu.
Olu johtolatdárkkisteamit dán vahkkus
Politiijat leat ovdal almmuhan ahte sii dán vahkkus čađahit olu johtolatdárkkistemiid, muhto liikká leat oallugat geat ribahit girddihit badjelmeare.
