-Almmuhus-
OĐĐASATGávccis dušše johtolagas skábmamánus

Gávccis dušše johtolagas skábmamánus

-

-

Oktiibuot leat 86 olbmo duššan johtolagas dán jagi. Dat lea njiedjan diimmážis, dalle go 94 olbmo ledje duššan johtolagas go skábmamánnu nogai.

Skábmamánu leat njeallje biilavuoddji, guokte vázziolbmo, okta mopedavuoddji ja okta el-čiehkansihkkelasti duššan. Guhtta dievdoolbmo ja guokte nissonolbmo dušše lihkohisvuođain. Skábmamánu lei nubbi jápminlihkohisvuohta el-čiekčansihkkeliin dán jagi. 

– Dakkár lihkohisvuođaid leat váruhan guhkit áiggi ja mii ballat mo el-čiekčansihkkel geavahuvvo dálveáigodaga. El-čiekčansihkkel lea olu unnit heivehuvvon dálvesiivui go dábálaš duolbmunsihkkel lea, dadjá Trygg Trafikk direktevra, Jan Johansen, preassadieđáhusas.

Buoret dálvedivodeapmi vázziolbmuide ja sihkkelastiide

Eambbosat ja eambbosat geavahišgohtet gávpogiin sihkkeliid fievrridangaskaoapmin go ráđđehus sávvá dan, muhto vai galgá sáhttit doalahit dan oasi geat sihkkelastet, gáibiduvvo eambbo sihke sis geat sihkkelastet, mieljohtaleddjiin ja luoddaeaiggádiin.

– Go mii vuos bargat dan badjelii ahte eambbosat galget vázzit ja sihkkelastit gávpogiin, de mii fertet maid láhčit dili nu ahte leat oadjebasat go válljejit geavahit sihkkela maiddái go galbmá ja go siivu šaddá hástaleaddjin sihke sihkkelii ja sihkkelastái. Okta diŋga leat buorit deahkat ja buorre čuovga, muhto maiddái ivdnás ja liegga biktasat ja oaivesuodji leat dehálaččat. Dasa lassin ferte dálvehoidu, nu go muohtačorgen ja botkkuheapmi, sihkkelluottain leat buorre. Dat mearkkaša ahte sihkkelluodda ja vázzinluodda, gokko oallugat vánddardit, ferte vuoruhuvvot eambbo go maid dan rádjái lea dahkkon, dadjá Johansen.

-Almmuhus-