Golbma nissonolbmo ja vihtta almmáiolbmo dušše johtolagas njukčamánus.
Dássážii leat 13 olbmo duššan johtolagas Norggas, seammá áigodagas diibmá ledje 14 olbmo duššan. Mihttu livčče ahte ii oktage galgga duššat ja garrasit roasmmohuvvat johtolagas. Dan olis lea biddjon mihttu ahte eai galgga eanet go 50 olbmo duššat johtolagas jagi 2030.
– Leat dušše gávcci jagi vel dasa. Mis lea nuppiin sániiguin hirbmat stuorra bargu vuordimis boahttevaš jagiid. Juohke áidna jápmin lea dohkketmeahttun, ja mii fertet buohkat leat veahkkin . Mii eat háliit ovttage massit, dadjá Trygg Trafikk seniorráđđeaddi Bård Johansen preassadieđáhusas.
Innlandetis dušše golmmas mannan mánus, muđui leat eará jápminlihkohisvuođat geavvan Agderis, Oslos, Rogalandas ja Vikenis.
Fargga beassážat
Beassážiid oktavuođas lassána johtolat, ja juohke áidna olmmoš sáhttá leat mielde váikkuheames ahte eai dáhpáhuva duođalaš lihkohisvuođat. Luottaid alde bohtet leat ollu mátkkošteaddjit, mii diehttelasat gáibida ahte vuoddji lea gozuid alde. Beassážat leat maŋŋit dán jagi, muhto siivvu sáhttá liikká leat váttis hálddašit. Sáhttet ain leat galbma ijat, mii dagaha ahte geainnut leat galja, čallá Trygg Trafikk.
– Heivet leavttu dálkki mielde ja fokusere vuodjima. Oallugat háliidit ollet jođánit ja álggahit luomu nu árrat go vejolaš, ja dat dagaha ahte olusat duolmmastit gása veahá beare garrasit. Váldde buori bottuid ja njulge julggiid. Vuoje várrogasat ja olle dearvan, loahpaha Johansen
