Juohke goalmmát biilavuoddji ii leat faskon dahje sihkkon biilaklása ovdal go vuoddjá. – Das fertejit olbmot rievdadit guottuid, lohká fuolastuvvan geaidnopolitiijahoavda Steven Hasseldal.
Dáhkádusfitnodat Frende Forsikring lea bálkáhan Norstat fitnodaga iskat man olu olbmot vudjet biillain, vaikko eai olus oainne biilaklásaid čađa jieŋa dahje lievlla dihtii. Iskkadeapmi čájeha ahte bealli gaskal 18- ja 29-jahkásaččain vudjet vaikko eai oainne geainnu bures.
– Fuolastuvan go nu olusat vulget vuodjit vaikko eai oainne. Dat sáhttá dagahit váralašvuođa ja lihkohisvuođaid, lohká geaidnopolitiijahoavda Steven Hasseldal.
Jagi 2019:s jugii politiija 435 álkes sáhku biilavuddjiide geat eai lean fuolahan buori oainnádaga biilaklása čađa. Diimmá statistihka logut čájehit ahte dat lei oassi sivain gávcci jápminlihkohisvuođas.
Šlárva olbmot
– Šlárvasut ii sáhte olmmoš leat ja čájeha ahte ii beroš eará olbmuid sihkarvuođas, lohká Frende Forsikring mohtorfágahoavda, Roger Ytre-Hauge.
Geaidnojohtolatláhka cealká ahte jus vuodjá fievrruin go ii leat doarvái buorre oainnádat, de sáhttá sáhkohallat, váidot ja sáhttá šaddat giddagassii dahje massit vuodjinlobi.
– Ovdalgo vuoddjá, de galgá biilavuoddji oaidnit juohke guvlui ja fuolahit ahte muohta, jiekŋa, lievla dahje dávvirat eai muosehuhte dahje hehtte oainnádaga, lohká Geaidnodoaimmahaga hoavda Hasseldal. Jus biilavuoddji oaidná bures ovddosguvlui, gurut- ja olgešguvlui, de ii oaččo sáhku politiijas, muhto jus lea uhcit oainnádat, de sáhttá 2600 kruvdnosaš sáhku oažžut. Dáhkádusfitnodat sáhttá maid geahpedit dáhkádusa dahje váldit dan ollásit eret.
Nuorat vearrámusat
Logut čájehit ahte Oslos gávnnahalle 23 proseantta vuodjimin heajos oainnádagain, Nordlánddas, Romssas ja Finnmárkkus gávnnahalle 25 proseantta ja eará fylkkain gávnnahalle gaskal 33 ja 35 proseantta. 49 proseantta gaskal 18-ja 29-jahkásaš nuorain, 30-41 proseantta gaskal 30–59-jahkásaš ollesolbmuin ja 22 proseantta rávesolbmuin, 60+ gávnnahalle vuodjimin almmá buori oainnádaga.
