Drošševuoddji Tom Erik Rasmus deaivvai iđđes guovžža lusa boahtit juste go lei herskkostallamin. – Suddu go ii lean bivdoáigi, lohká Rasmus.
Drošševuoddji Tom Erik Rasmus deaivvai iđđes guovžža lusa boahtit juste go lei herskkostallamin. – Suddu go ii lean bivdoáigi, lohká Rasmus.
– Dat ii várra fuomášan mu ovdal go ledjen 50 mehter duohken, luotta alde ledje geađggit mat varra beške go vudjen daid badjel. Nu guovža njuikii badjel geaidnoáiddi ja ruohtastii meahccái, čilge Tom Erik Rasmus.
Lei borramin
Rasmus lea drošševuoddji Gáregasnjárggas ja son lei ge iđđes árrat jođus skuvlamánáid viežžat skuvlii. Bajábeale Guohppenjavi Aŋŋel geainnu alde fuomášii ge son guovžža.
– Guovža lei juste borramin ealgga man lea leamaš goddán. Luottaid mielde oaidná mo dainna lea geavvan, muitala drošševuoddji.
Maŋŋil go guovža lei ruohtastan báhtui de oinnii Tom Erik dan doppe rissiid siste.
– Dáiddii leat 100 mehter duohken, in mun geargan govvet dan guovžža gal.
– Ii lean bivdoáigi
Olusiidda livččii várra imaš dáhpáhus guovžža beassat oaidnit nie lahka, ja máŋggas livčče várra suorganit maid veaháš. Muhto ii dát almmái gal.
– In lean suorganan, maid das suorganit duššiid. Mun gal lean guovžžaid oaidnán ovdal. Jurddašin dušše ahte lea vahát go ii lean bivdoáigi dál, čaibmá Tom Erik.
– Maid ban de livččet dahkat?
– Na de livččen vázzilit dan guovžža maŋŋái.
Bivdá guovžžaid
Tom Erik láve bivdit sihke ealggaid ja guovžžaid, muhto dássážii ii leat báhččán guovžža gal vuos. Muhto dasa gal orro ráhkkaneamen.
– Mus lea oainnat guovžabeana, dakkár vielppesbeana, ja maŋŋil go ledjen skuvlamánáid dolvon de vižžen vielpá ja mannen dainna dohko dan ealgaráppi lusa. Doppe dikten susttašit dan, ealgga gal havssii muhto in dieđe nagodii go guovžža haksit, muitala ieš.
