Máhte Pier Ándde siidda lea gáibidan giddet skohterláhttu 10, Kárášjoga gielddas.
Kárášjoga gieldda skohterláhttu 10 lea gaskaboddosaččat giddejuvvon, Máhte Pier Ándde siida lea ávžžuhan Finnmárkku fylkkamánni giddet skohterláhttu ođđajagemánu 11. beaivve rájes, fylkamánni lea čuovvolan ávžžuhusa.
Sivvan skohterláhttu giddemii lea go Máhte Pier Ándde siiddas lea eallu guovllus, seammás lea ollu muohta ja báikkis lea heajos guohtun.
Bohccot dárbbašit ráfi ja lea vahát mastadit eará ealuiguin mat leat lahkosis. Kárášjoga gielda ii leat buktán cealkámuša ávžžuhussii.
Máhte Pier Ándde siida dieđiha fylkamánnái seammás goas johtolatgielddus fas sáhttá heaittihuvvot.
