-Almmuhus-
OĐĐASAT– Gáržžohallen, ii lean go váidit

– Gáržžohallen, ii lean go váidit

-

-

Nie čilge Jovsset Ánte Sara, guhte lea váidán stáhta go oaivvilda alcces mearreduvvon menddo vuollegis boazologu, nammalassii 75 heakka. Sis-Finnmárkku diggegoddi gieđahallagoahtá ášši ihttin, diggái leat várrejuvvon vihtta beaivvi.

– In lean jurddašan ja jáhkkán ahte ná stáhta meannuda olbmuid dili. Maid eará baháid diehtá dahkat go váidit, lohká Jovsset Ánte Sara.

Son lea biehttalan dohkkeheames mearriduvvon boazologu iežaset siidii. Stáhta lea mearridan sutnje 75 heakka.

Jovsset Ánte Sara ii loga iežas láhkadovdin, muhto lohká diehtit mii leat riekta ja boastut.

– In lean okto arvat diggogoahtit stáhta vuostá, muhto buori lihkus leat čeahpes ja buorit olbmot mu birrasis, lohká son.

 

«Fápmoválddiin»

Su mielas lea stáhta álgoálbmoga meannudeamen fápmoválddiin, go dán láhkái meannuda boazodoalloáššiid, go mearridit boazologu nu vulos ahte ii leat šat birgenláhki.

– Leat njulgestaga «fápmoválddiin» meannudan mu. Stáhta lea njulgestaga boazodolliid rohttemin eret ealáhusas oktan ruohttasiiguin. Erenomážit boahtá dat oidnosii go nuoraid čuldet eret boazodoalus. Ovdal leat nuorat beassan bargat alcceseaset ealu ja birgejumi, leaš dal siidaoassi dahje ii. Nu galggašii rievtti mielde min ealáhus ain leat, dadjá nuorra boazodoalli dasa go dál šaddá stáhtain lágastit birgehan dihte iežas vuoigatvuođaid boazodoalus.

 

Dulbmojuvvon

Su mielas lea ilgat go Norga orru álgoálbmoga ealáhusa oalát duolbmumin.

– Boazosámit masset juo sisabahkkemiidda guohtoneatnamiid, ja dál dahkkojit vel boazologu mearrádusaiguin bahádahkkin iežaset beaivválaš barggus árbevirolaš ealáhusas, dadjá Jovsset Ánte Sara.

 

Diggái leat várrejuvvon vihtta beaivvi, muhto advokáhtta Trond Biti, guhte ovddasta Jovsset Ánte Sara ášši, ii loga jáhkkit nu guhkes áiggi geavahit go juridihkalaš váikkuhusaid ii leat nu váttis ovdanbuktit.

– Mun oaivvildan mis lea nanu ášši, lea čielggas ahte sutnje lea čuohcan garrasit go lea šaddan gorrelogu mielde unnidit ealu, dadjá Biti, ja joatká muitaleames ahte nu go dál lea dilli, de ii olat Jovsset Ánte Sara buvttadusgáibádusa, mii lea 50 000 kruvnna, ja nu massá maiddái doarjagiid.

– Nagoda 25 000 kruvnna ovddas vuovdit, ja nu ferte dan 75 heakka duppalastit jus galgá nagodit olahit gáibádusaid. Mun oaivvildan ahte unnimus 250 heakka fertejit olbmos jus galgá nagodit birget, dadjá Trond Biti.

(Ášši joatká gova vuolábealde)


DEHÁLAŠ ÁŠŠI MII MEANNUDUVVO: Jovsset Ánte Sara advokáhtta Trond Biti.
Vuorkágovva/Inga Marie Guttorm

Trond Biti lohká eaktun go olmmoš oažžu álggahandoarjaga, nu go Jovsset Ánte Sara lea ožžon, de lea ahte galgá birget, muhto boađus lea ahte son ii birge go sutnje lea mearriduvvon boazolohku nu vulos ahte ii leat birgejupmi.

 

Stáhta ii sáhte vuoittáhallat

Trond Biti lohká stáhta ii sáhte dan áššis vuoittáhallat ja árvideames jus vuoittáhallá, de guoddaluvvo ášši ja soaitá gitta alimusriektái guoddaluvvot.

– Dikki bohtosis leat stuorra váikkuhusat, sihke stáhtii ja Sarai vaikko mo de lea boađus. Lea prinsihpalaš ášši mas leat váikkuhusat, lohká Biti.

Son čilge ahte Sara váikkuhusat lea go son ii birge 75 heakkain.

– Jus stáhta vuoittáhallá Sarai dán áššis, de ferte ollu mearrádusaid nuppástahttit. Dá lea oalle dehálaš ášši mii galgá meannuduvvot, mii maiddái váikkuha ollusiidda, iige dušše Jovsset Ánte Sarai, loahpaha Biti.

 

 

 

-Almmuhus-