Kárášjoga spábbačiekčanšilljus eai leat čuovggat, ja danin ferte Nordlys valáštallansearvi čiekčat ruovttučiekčama Porsáŋggus.
Kárášjoga spábbačiekčanšilljus eai leat čuovggat, ja danin ferte Nordlys valáštallansearvi čiekčat ruovttučiekčama Porsáŋggus.
Niitoguolbana spábbačiekčanšilljus eai leat goassege leamaš olgočuovggat, ja danin lea Nordlys juohke jagi gártan sirddašit čiekčamiid čavččabealde.
Gaskavahkku deaivvadit Riehpovuona joavkkuin Indrefjordain. Singuin eai nagodan soahpat sirdit čiekčama, ja danin lea Finnmárkku spábbačiekčanbiire mearridan ahte čiekčan lágiduvvo Porsáŋggus.
– In leat goassege gullan ahte muhtin joavku šaddá čiekčat vierrošilljus ruovttučiekčama. Dán leat šaddan dohkkehit, ja dat čuohcá midjiide ekonomalaččat. Mii massit bileahtta- ja káfedietnasa ja mátkkoštangolut lassánit, čilge Nordlys A-joavkku hárjeheaddji Rasmus Somby.
Sihte mávssu
Nordlys bivddii sirdit čiekčama mannan vahkkolohppii, muhto dása ii miehtan Indrefjord go ledje čikčiide lohpidan luomu.
Nordlys árvalii dalle čađahit čiekčama plánejuvvon beaivvi, muhto ahte galge álgit moadde diimmu árat.
– Mis ledje máŋga árvalusa, muhto eai miehtan masage. Jus ledje galgat árat boahtit ihttin, de gáibidedje gaskal 8.000-12.000 ruvnnu mávssu. Dán gal eat dohkkehan, in leat gullan eará go Barcelona joavkkus dákkár gáibádusaid, lohká Somby.
– Sirdin ferte árat árvaluvvot
Indrefjord valáštallansearvvi hálddašan direktevra, Rune Sandvik duođašta ahte merre mávssu jus ledje galgat árat álggahit čiekčama.
– Min čiekčit ledje šaddat váldit friddja barggus, ja dat čuozašii sin ekonomiijai, čilge son.
Sandvik muitala maiddái ahte ovdal go ráidočiekčamat álget, de plánejit sihke giđa- ja čakčaáigodaga.
Sii heivehedje čiekčamiid nu ahte čiekčit ožžo guhkebuš geasseluomu, dasa lassin organiserejedje nu ahte ožžot smávva čakčaluomu.
– Mii leat šállošan Nordlysii go eat sáhttán sirdit čiekčama, muhto ii ábut beannot vahkku ovdal čiekčama árvalit sirdima. Dán ferte dahkat ovdal go ráidočiekčamat álget, čilge son.
Ii leat dábálaš mearrádus
Go joavkkut eaba gulahallan, de fertii Finnmárkku spábbačiekčanbiire dahkat mearrádusa áššis.
Nordlys gillá danin go šaddet vierrošilljus čiekčat ja danin go ožžot mátkegoluid čiekčama geažil. Indrefjord ges šaddá máksit bánaláiggu Porsáŋgui go sis oatnu mátkkošteapmi.
– Lei lunddolaš sirdit čiekčama vai Indrefjord ii dárbbaš eanet gillát danin go Nordlys ii leat árvalan sirdima ovdal go ráidočiekčamat álge. Mearrádus dieđusge beahttá nuppi joavkku, ja lea hui váivi go ná šattai. Ii leat dábálaš ahte spábbačiekčanbiire gártá dákkár mearrádusaid dahkat, ja mii sávvat ahte Nordlysis bisošii mokta spábbačiekčanšilljus, lohká Finnmárkku spábbačiekčanbiire ráidočiekčama hálddašeaddji Rune Haugseth.
Eai beasa fávdnát hárjehallat ge
Sevdnjes rássešillju dagaha maiddái ahte Nordlys spábbačiekčit eai beasa fávdnát hárjehallat čakčat, muitala hárjeheaddji.
– Mun árvalivččen sirdit čuovggaid čievrabánas Niitoguolbanii. Livččii han hui dehálaš hárjehallat, muhto mis šaddet oanehat ja oanehat hárjehallamat. Maŋŋel diibmu 19.00 eat šat oainne čiekčat. Mun dieđán ahte Nordlys lea bargamin dáinna áššiin, muhto ii valáštallanjoavku nagot okto ordnet čuovggaid, dadjá Rasmus Somby.
Eai olámuttos
Nordlys valáštallansearvi eaiggáduššá Niitoguolban spábbačiekčanšillju. Ávvir ii leat ožžon valáštallansearvvi jođiheaddji, Egil Olli ságaide gullandihti man láhkai áiggošedje čoavdit hástalusa. Kárášjoga gieldda njunušpolitihkkárat eai ge leamaš olámuttos muitalit lea go sis vejolašvuohta doarjut valáštallansearvvi.
