Maŋemus jándoris lea politiijaid operašuvdnaguovddaš leamaš njuolggusin «politiijaid beanaguovddaš».
Maŋemus jándoris lea politiijaid operašuvdnaguovddaš leamaš njuolggusin «politiijaid beanaguovddaš».
Politiijaid operašuvdnaguovddaš leat ásahan Twittera, man bokte dieđihit maŋemus dáhpáhusaid politiijaguovllus.
Maŋemus jándoris ii leat nu olu mii lea dáhpáhuvvan, leat dušše veahá feastariejat leamaš, muhtun gii lea almmolaš báikkis gožžan, ja nu ain.
Eanas dain dáhpáhusain stuorit báikkiin.
Ohcet beanaeaiggádiid
Dat mii lea buot eanemus mearkkašáhtti maŋemus jándoris leamaš lea ahte politiijaid operašuvdnaguovddaš lea šaddan beanaohccánbáikin.
Sii dieđihit Twitteris ahte leat vihtta beatnaga láhppon, dahje eai gávnna eaiggádiid daidda, maŋemus 19 diimmus.
Measta galggašii «beanaguovddaš»
Politiijaid operašuvdnajođiheaddji, Eirin Hansen Abuukar, reaškkiha go Ávvir jearrá leat go sii gártame beanaguovddážiin.
– Sáhttá muhtumin galggašii sierra beanaguovddaš gosa dieđihit beatnagiid. Ii nu dávjá lihkkus boađe diehtu ahte meahcis leat láhppon, ja maid ahte ogohallet bohccuid ja eará elliid.
– Eanas gávpogiin gos dieđihit go oidnet luovosbeatnagiid. Ipmirdan Sis-Finnmárkkus gal lea oalle dábálaš beana mii ruohttá luovos, lohká son.
Šearbmagovva
Ogohalle bohccuid
Vearrámus dáhpáhus lei várra go guokte loddebeatnaga ogohalle ealu Ealetnjárggas, Álttá suohkanis.
Beatnagat bállejedje ogohalle ealu moadde diimmu, ovdal go boazobargit bohte báikái ja nagodedje daid oažžut máhccat ruovttu guvlui fas.
– Eai leat gávdnon dat beatnagat. Eaiggát galggai odne vuolgit fas ohcat daid, ja boazobargit galge maid dieđihit jus oidnet daid beatnagiid, muitala Hansen Abuukar.
Beatnagat luotta alde
Riehpovuotnabađas, Fálesnuori suohkanis, fas leat dieđihuvvon guokte beatnaga luotta alde. Ealgabeana ja loddebeana.
Politiijat bivdet ságaide eaiggádit.
Eai Nuorta-Finnmárkkus ge beassan beanaságaid meaddel. Doppe dieđihuvvon lea Báhčaveajis beana mas ruksesčuovgabáddi čeabehis. Politiijat ohcalit eaiggáda.
– Eat leat ožžon dieđu ahte leat eaiggádiid lusa boahtán dát beatnagat, muitala son vel loahpas
