Finnmárkku politiijaguovllus dieđihit Twitter bokte dán vahkoloahpa leat earret eará gieđahallan gárrenolbmuid ja skohtervuodjimiid.
Finnmárkku politiijaguovllus dieđihit Twitter bokte dán vahkoloahpa leat earret eará gieđahallan gárrenolbmuid ja skohtervuodjimiid.
Otne iđđes lei okta biila vuodján badjel geainnu «Storsvingenis» Hammerfeastas. Politiijat leat leamaš oktavuođas vuddjiin, ja ii lean oktage roasmmehuvvon.
Mannan ija diibmu 03.18 ožžo politiijat dieđu ovtta ásodagas Hammerfeasta gávpotguovddážis čuojahuvvui musihkka beare jitnosit. Politiijat manne báikái ja gohččo vuolidit jiena musihkas.
Diibmu 23.39 ikte eahkes ges bártidii okta dievdu, gaskkal 50 ja 60 jagi, iežas gussiiguin Álttás Aronjárggas. Politiijat manne báikái ja ožžo gussiid vuolgit báikkis.
Ikte eahkes Áisaroaivvis válde politiijat iežaset háldui ovtta beatnaga. Beana lea amas nálli, dábálaš sturrodat ja lea ruškat ja vielgat. Politiijat dáhttot eaiggáda váldet singuin oktavuođa.
Boazopolitiijat dolle ikte mohtorjohtolat dárkkisteami lulábealde Máze. Boađus das lei ahte sii čálle 10 sáhku váilevaš jealbmageavaheami geažil, ja okta váidui go lei vuolleahkásažžii luoikan skohtera.
Nuorta Finnmárku
Ikte beaivet diibmu 10.33 ožžo politiijat dieđu ahte Buolbmát duollobáikkis lei badjelmeare juhkkán dievddu, gii ii sáhttán áimmahuššat iežas. Politiijat vižže dievddu ja dolvo su doaktára lusa.
Diibmu 12.18 Reaisavuonas, Mátta-Várjjagis váidojuvvo golbma olbmo Boazopolitiijaide go gávnnahalle vuodjime skohteriin olggobealde lobálaš máđija.
Ikte iđđes diibmu 07.35 ožžo politiijat dieđu skihkkamuosehuhttoma priváhta ásodagas Girkonjárgga gávpotguovddážis. Okta dievdu, gaskkal 20 ja 30 jagi váldui giddagassii go lei badjelmeare juhkan.
Unjárggas ike diibmu 11.43 ožžo politiijat dieđu ahte ovtta 60 jahkásaš badjelmeare juhkan dievddu birra olggobealde ovta dálu. Dievdu dolvojuvvui Čáhcesullui giddagassii čielgat.
