Gárrendiŋggaiguin leat politiijat šaddan dáistalit mannan ija ja dál iđđes.
Dat lea stuorit báikkiin gos leat oalle dávjá bearehaga gárihuvvan olbmot, ja nu ledje dál maid.
Sihke Álttás, Hámmárfeasttas ja Mátta-Várjjagis leat politiijat šaddan gieđahallat olbmuid geat leat beare olu alkohola juhkan.
Mátta-Várjjagis vuos ledje muhtun nuorat čoahkkana priváhta vissui feastta doallat, dan šadde politiijat mannat bissehit go lei beare riedja.
Njuolga maŋŋel de šadde mannat ovtta juhkanbáikái Álttás ja doalvut eret dievddu gii lei beare olu juhkan. Goalmmátlotjahkásaš dievdu oaččui gildosa šat boahtit gávpotguovddážii dan ija.
Ii mannan go 20 minuhta, de šadde fas gávpotguovddážis doalvut eret ovtta čihččetlotjahkásaš dievddu. Beare gárremiin, ja sutnje ge gildosa ahte ii šat boahtit gávpotguovddážii dan ija.
Diibmobeale maŋŋel de lei Hámmárfeasttas ges gárrendiŋga gean šadde doalvut ruoktot.
De gal lea leamaš jaskat gitta iđidii gávcci rádjái, go gávdne fas eará gárrendiŋgga oađđime Bossugohpis muhtun rámbuvrra olggobealde. Su sii loktejedje čuožžut ja čogádedje mielde, nu beasai iežas seŋgii mannat nohkkat.
