Guovddášbellodat gáibida garraseappot hálddašit feastonuohttefatnasiid geatnegasvuođa buktit guliid gáddái Davvi-Norgii.
Guovddášbellodat gáibida garraseappot hálddašit feastonuohttefatnasiid geatnegasvuođa buktit guliid gáddái Davvi-Norgii.
Norggas leat stuorra feastonuohtefatnasat (trolárat), maid guolleindustriijat eaiggáduššet, ožžon guolleeriid mat geatnegahttet guliid buktit Davvi-Norgga kájaide.
Dat earit leat addon dainna eavttuin ahte galget dagahit aktivitehta Davvi-Norgga rittu báikegottiin.
Dat ortnet dávjá gohčoduvvo geatnegasvuođavuogádahkan.
Stuorradiggi galgá dál meannudit Sosialisttalaš Gurutbellodaga (SG) evttohusa, ahte heaittihit dan ortnega ja addit daid eriid vuotnafatnasiidda main dat leat váldon eret.
Ovddit ášši Stuorradiggái
Guovddášbellodat aŋkke ii leat seamma oainnus go SG, ahte addit daid eriid fas ruovttoluotta vuotnaguolásteddjiide, go leat kritihkalaččat «botket báttiid gaskal ábi ja fiervvá», nu go ieža dadjet.
Liikká oaidná Guovddášbellodat dehálažžan ahte šaddet váikkuhusat feastonuohttefatnasiidda mat eai eai deavdde eavttuid mat leat eriin.
Danne evttoha Guovddášbellodat čuovvovaš evttohusa Stuoradiggái: «Stuorradiggi sihtá ráđđehusa hálddašit geatnegasvuođavuogádaga dan láhkai ahte feastonuohttefatnasat duođas buktet guliid báikkalaš servvodagaide nu go eavttut leat geatnegasvuođas.
Molssaeaktu lea dasto, ahte jus dat ii dahkko 2 jagi siskkobealde, de addojit daid fitnodagaid earit ruovttoluotta vuotnafatnasiidda.»
– Guolit galget gáddái
Evttohus ovddiduvvo Stuorradikki meannudeapmái dán mánu 11. beaivvi.
– Guovddášbellodagas lea áibbas čielggas dán áššis, ahte guolit galget buktot gáddái Norggas. Jus guollefitnodagat eai deavdde eriid eavttuid, de ferte unnidit sis eriid. Jus šaddá unnidit feastonuohttefatnasiid eriid, de galget nannet vuotnafatnasiid mat buktet guliid báikkálaš industriijaide, dadjá Guovddášbellodaga stuorradiggeáirras Geir Adelsten Iversen preassadieđáhusas.
Ádjána ollašuhttit
Guovddášbellodaga bealis čuoččuhit SG ovddidan heajos evttohusa, ahte oalát heaittihit geatnegasvuođavuogádaga ja daid addit vuotnaguolásteddjiide.
Sin mielas lea dat heittot, go dakkár sirdima ádjána ollašuhttit gaskal 15-30 jagi.
Guovddášbellodat maid cuiggoda go SG ii leat bidjan makkár ge áigemeari iežaset evttohusas.
– Hoahppu
Guovddášbellodagas aŋkke lea dat oaidnu ahte ráđđehus galgá árvvoštallat SG evttohusa ja giđa mielde ovddidit ášši Stuorradiggái.
– Lea hoahppu ásahit doaimmaid Davvi-Norgga guolleindustriijas. Mii jáhkkit ahte jus fitnodagat ožžot čielga dieđu, ahte massit eriid dahje buktit guliid gáddái, de sii gávdnet čovdosiid mot olahit geatnegasvuođa mat lea dain eriin. Jus eai nagot dan olahit, de sirdojit dađi mielde dat earit vuotnaguolásteddjiide, dadjá Guovddášbellodaga stuorradiggeáirras Geir Pollestad seamma preassadieđáhusas.