Oaivvildit ahte ráđđehus ii áŋgiruša áššiiguin mat gusket Romsii ja Finnmárkui.
Romssa ja Finnmárkku fylkkaráđđi čállá cealkámušas ahte sii oaivvildit ahte alitráđđehus ii ollašuhte vuordámušaid mat sis ledje stádabušehttii.
– Romssa ja Finnmárkku oassi stádabušeahtas ii leat dohkálaš. Mii eat leat hirpmahuvvan. Dat lea dušše vel okta ovdamearka dán ráđđehusa váilevaš áŋgiruššamis olbmuide geat orrot davvin. Dás lea sáhka olbmuin ja min oktasaš guovlluid ovddideamis, čállet sii cealkámušas.
Čuohcá álbmogii
Ovdamearkkat maid fylkkaráđđi namuha leat bággooktiičaskin, váilevaš ruhtadeapmi goluide mat bohte oktiičaskimis, bargodoaimmaid sirdin ja gáržžiduvvon rámma- ja ovdánahttinjuolludeamit.
– Loahppaboađus lea ahte fylkkasuohkan ferte čađahit čuohppamiid mat čuhcetNorgga stuorámus fylkka olbmuide ja bálvalusaide, joatká fylkkaráđđi.
Váillahit ollu
Stádabušeahtas váillahit sii juolludemiid geaidnoáimmahuššamii ja uđassihkkarastemii, maid deattuhit leat sáhkan olbmuid sihkarvuođas. Sii maid váillahit čielggadeami liigegoluid ektui covid-19 geažil, ja movt ođđa fylkkasuohkaniid bargodoaimmat ja daid golut galget gokčot. Maiddái váillahit stáhtalaš ruhtadanfoandda mii addá vejolašvuođaid almmolaš surggiide váldit dehálaš rolla ruoná nuppástuhttimis.
– Guolástanhápmanat leat vel bargodoaimmat maid ráđđehus lea sirdán vaikko eai leat ollislaččat ruhtadan dan. Dat iige leat báljo ruhtaduvvon dán bušeahtas. Dat mii baicce lea dán bušeahtas lea ain unnán regionála ovdánahttinruhta. Maiddái mearradoallofoandda badjelgehččo, mii lea ruhta mii galgá manná njuolggut servvodatovdánahttimii earret eará oahpahusas, johtolagas, ealáhusas ja kultuvrras, čállá fylkkaráđđi.
Molsut ráđđehusa
Dál sii bidjet vuordámušaid ráđđehussii ja sávvet ahte áŋgiruššan davviguvlui galgá eanet go čáppa sánit.
– Hui váivi, muhto sávvat ahte olbmot davvin morihit. Ráđđehus ii vuorut davviguovlluid, danne fertet molsut ráđđehusa boahtte stuorradiggeválggas boahtte jagi. De lea doaivva Davvi-Norgga álbmogii, loahpaha fylkkaráđđi cealkámuša.
