Dáloniid Listtu sámediggeáirras oaččui stuora doarjaga dievasčoahkkimis, ahte dálusámiid njealjejuvllagiid ii galgga merket GPS-rusttegiin.
Sámedikki mielas galggašii sámi meahcásteapmi oažžut láhkasuodjalusa ja ovdánahttinvejolašvuođaid álbmotvuoigatvuđolaš standárddaid mielde. Dan dihtii nammadii Sámediggi lávdegotti jagi 2017:s mii galggai iskat mohtorjohtolatlága ja evttohit rievdadusaid láhkii ja sámi gilážiid ja báikegottiid hálddašeapmái. Árbevirolaš meahcásteapmi lea rievdan doloža rájes dássážii, dan duođašta mohtorjohtolat meahcis. Fievrridit ruoktot dan maid lea háhkan meahcásteami bokte, lea vuohki mo joatkit árbevirolaš meahcásteami. Danin evttoha lávdegoddi pilohtaprošeavtta golmma jagi badjel, mas sáhttet iskat lea go vejolaš, Lov om forsøk i offentlig forvaltning ektui, oažžut duođaštuvvot leat go hehttehusat mat hehttejit sápmelaččaid meahcásteami.
Ii merket ATV GPS:in
Lávdegottis lei okta lahttu, Ávjovári Johttisápmelaččaid listtu sámediggeáirras, Anders Somby jr., evttohan GPS-merket njealjejuvllat sihkkeliid, vai politiija ii dárbbaš geavahit ruđaid vákšut bievlavuodjima jus báikeolbmot ožžot lobi vuodjit gieldda bievlamáđijain, eaige dárbbaš ohcat sierralobi.
Dáloniid Listtu Isak Mathis O. Hætta evttohii ahte Sámediggi ii galgga doarjut evttohusa merket njealjejuvllat vuojániid GPS:in. Dan dorjo 34 áirasa 35 áirasis, earret go ieš Anders Somby jr. gii lei dan evttohan.
– Árvalin ahte Sámediggi galgá hilgut merkemis dáloniid njealjejuvllat sihkkeliid. Mu mielas ii leat riekta merket olbmuid vuojániid GPS:in. Vákšun lea maid oassi dás. Mun lean dakkár olmmoš ahte mun luohtán olbmuid nala ahte čuvvot njuolggadusaid, čilge Isak Mathis O. Hætta ja lohká iežas giitevaš go olbmot dorjo su evttohusa.
Dasa lei Áilin Nigá Máhtte / Mathis Nilsen Eira (Norgga Sámiid Riikkasearvi (NSR)) ovttaoaivilis.
Pilohtaprošeakta, iige GPS merken
Johttisámelisttu Sámedikke áirras Anders Somby jr. čilge ášši jorai lávdegotti pilohtaprošeavttas njealjejuvllat GPS merkemii. Son atná unohassan dan, go pilohtaprošeavtta gieđahallamis han galget iskat ja oaidnit guđe láhkii dat doaibmá. Mohtorjohtolatláhka lea gielddusláhka mas eai leat vuoigatvuođat. Danin háliidit álggahit pilohtaprošeavtta maid fylkkamánni doarju, go dan nama bokte sáhttá mannat mohtorjohtolaga meattá, go prošeavtta bokte galgá dat iskojuvvot.
– Buot maid Isak Mathis O. Hætta ovddidii sárdnestuolus čužžot juo lávdegotti barggus. Silje Karine Muotka vikkai vel sárdnestuolus dan čilget. Diet evttohus maid Isak Mathis O. Hætta evttohii, leat visot dan meahcásteami lávdegotti bargodokumeanttain ja dat mii lea meannuduvvon pilohtaprošeavtta oktavuođas, čilge Anders Somby jr .
Su mielas orru Isak Mathis O. Hætta geahččaleamen mohtorjohtolatlága earáhuhttit, vaikko Stuorradikkis ii leat dasa eanetlohku.
– Danin ferte prošeakta bidjot johtui. Mis livčče dalle vejolašvuohta ákkastallat buorebut ahte sápmelaččain lea earálágan luonddugeavaheapmi, dadjá Anders Somby jr. loahpas.
