Nu lohká Norgga Boazosápmelaččaid Riikkasearvvi jođiheaddji šiehtadallamiid birra, boahtte jagi boazodoallošiehtadussii. Boazodoallu oažžu dál 4,1 miljovnna ruvnno eambbo go diibmá, ja dan lohká Jåma dat buot unnimus masa sáhtte miehtat. Son čilge ahte lei jur dan alde ahte šiehtadallamat eai boatkanan.
Ikte gerge Norgga Boazosápmelaččaid Riikkasearvi (NBR) ja Eanandoallo- ja biebmodepartemeanta (EBD) boazodoallošiehtadusa šiehtadallamiiguin. Jagi 2017/2018 boazodoallošiehtadus lea gárvvis.
– Lean ilus go leat boahtán ovttaoaivilii. Šiehtadus vuoruha doaimmaid mat galget lasihit dietnasa ja dagahit eambbo njuovvama. Šiehtadus addá vuođu positiivvalaš ovdáneapmái, ja eambbo dietnasa ovttaskas boazodoallái, lohká eanandoallo- ja biebmoministtar Jon Georg Dale (Ovddadusbellodat) preassadieđáhusas.
Obbalaš supmi lea 118,6 miljovnna ruvnno. Dat lea 4,1 miljovnna ruvnno lasáhus dálá šiehtadusas.
(Ášši joatká gova vuolábealde)
Dušše ovtta čuoggás obbalaš loguin ii leat lassáneapmi diimmáža rájes. Dat lea čalgoortnegis. Das lea seamma supmi go diimmá šiehtadusas.
Boazodoalu Ovdánahttinfoanda lea ožžon 1,2 miljovnna eambbo go diibmá.
Organisasšuvdnadoarjagat leat lassánan 0,4 miljovnnain, ja njuolggodoarjagat lassánan 2,5 miljovnnain.
Šiehtadallamat measta boatkanedje
NBR jođiheaddji Ellinor Marita Jåma lohká ahte ledje gáibideaddji šiehtadallamat, ja measta šadde botket daid oalát.
– Álggos leimmet áibbas goabbat oainnus, muhto nagodeimmet lahkonit nubbi nuppi loahpas. NBR garra vuoruhemiid dihte nagodeimmet soahpat, lohká Jåma.
Son čilge ahte NBR:s ledje njeallje ášši maid garrasit vuoruhedje.
Dat ledje orohatdoarjja, oahpahalliortnet, organisašuvdnadoarjja ja oažžut bargojoavkku mii galgá bargat iešstivrenraporttain. Daid leat vuoruhan ovttas NBR báikkálaš servviiguin.
– Lei mearrideaddji ahte oaččuimet oahpahalliortnega mielde, lohká Jåma.
Oahpahalliortnet lea ožžon 2 miljovnna, seamma go ovddit šiehtadusas.
4,1 miljovnna lasáhus
Jåma lea duhtavaš go leat nagodan oažžut 4,1 miljovnna lasáhusa, go su dieđu mielde ii leat dat dáhpáhuvvan goasse, ii goit daid maŋemuš jagiid.
– Dálá ráđđehus lea lohkan áigut heaittihit ealáhusšiehtadusaid, ja lean ilus go de nagodeimmet oažžut lasáhusa. Ferten maid rámidit stáhtaráđi go lea váldán min duođas, go mii leimmet nu goabbat oaivilis ahte šiehtadallamat livčče sáhttán boatkanit, muhto son áiggui joatkit šiehtadallamiiguin, ja dan anán árvvus, lohká Ellinor Marita Jåma.
