Garra eanandoarggástus dáhpáhuvai Gironis mánnodaga čuovganeapmái. Dat lea garraseamos ruvkedoarggisteapmi mii goassege lea dáhpáhuvvan Ruoŧas ja mihtiduvvui 4,8 Richter mihtus.
Ruvkebargit geat ledje eatnan vuolde evakuerejuvvojedje. Ruvkefitnodat LKAB dieđihedje ahte geađggit leat gahččan ruvkkes ja ahte lea ain seismihkalaš lihkadeapmi báikkis.
Ii oktage galgga roasmmohuvvan eanandoarggástusas Gironis. Muhto Gironis leat olu ássit dovdan eanandoarggisteami.
Girona ássi Per Nilsson čilge ahte olles dállu doarggistii ja son jáhkii ahte olles dállu gáhččá.
– Olles dállu doarggistii ja lihkadii 15 sekundda, ja lei nu garra doarggisteapmi ahte illá bisson julggiid alde lohká son.
Björn Lund, Uppsala universitehta seismologa dadjá dát lea garraseamos ruvkedoarggisteapmi mii lea dáhpáhuvvan Ruoŧas goassege.
Dal leat iskame ášši eai ge dieđe vel siva manin eanan álggi doarggistit Gironis. Muhto LKAB ruvkedoaimmahat sáhttá leat sivvan manin dat dáhpáhuvai. Girona ruvkkes LKAB viežžá málmma 1365 mehtera eatnan vuolde.
Bissehan buot doaimmaid
LKAB ruvkefitnodat dieđihit ahte leat bissehan sin doaimma.
– Dat lea stuorit dáhpáhus, danin mii leat evakueren buot olbmuid geat barget eatnan vuolde. Ja buohkat leat boahtán bajás. Mii leat maid gidden buot doaimmaid eatnanvuole ruvkkes, dadjá LKAB preassagulahallanolmmoš Fredrik Björkenwall.
LKAB ruvkefitnodaga eaiggáda Ruoŧa stáhta ja 2019 dinii fitnodat 31 miljárdda ruvnna ja sis leat 4 300 bargi.
(©NTB)
