Stáda luoddadoaimmahat dieđiha ahte dán vahkkoloahpa lea heajos vuodjinsiivu Nordlánddas ja Romssas.
Lávvordaga ja sotnabeaivve leat vurdojuvvon garra arvvit Saltenis, Ofotenis, Vesterålenis ja Lulli-Romssas. Lávvordat iđidii lea dieđihuvvon dulvevárra davvi Nordlánddas ja lulli Romssas. Dáin báikkiin lea maiddái dieđihuvvon garra biekkat ja uđasvárra.
Dan dieđihit Meteorologalaš instituhtta (MET) ja Norgga čázádat- ja energiijadirektoráhta (NVE), geat leat bidjan runta várradieđáhusa dán vahkkolohppii.
– Vuodjinsiivvut sáhttet hedjonit, ja sáhttet šaddat maid nu vearrá ahte luottat giddejuvvojit, lohká Håvard Langmo, gii bargá Stáda luoddadoaimmahaga johtolatguovddážis Davvi-Norggas.
Son ávžžuha olbmuid čuovvut mielde dieđuid mat bohtet Stáda luoddadoaimmahagas ja eará gearggusvuođaeiseválddiin.
– Mii ávžžuhit vel vuddjiid árvvoštallat jus lea dárbbašlaš mátki. Ferte heivehit leahtu siivvu mielde.