Ievttá eahket ledje dáhkádusfitnodagat ožžon dieđu ollu bilidemiid birra garradálkki «Knud» geažil mii meašui mátta-Norggas. Dál lávvardat iđit dieđiha meteorologalaš instituhtta ahte mátta-Norggas lea váhččemin garra dálki, ja ii ge šaddan dattetge nu garas go lei dieđihuvvon.
Bearjadat eahket diibmu 21.30 ledje dieđihuvvon 15 bilideami, garra dálkki «Knud» geažil, Frende dáhkádusfitnodahkii.
– Sihke Kristiansánddas, Lyngdalas, Oslos, ja Bergen guovllus leat dieđihuvvon ollu bilideamit, dadjá visttiid vaháthoavda Ynge Amundsen Høvig Frende dáhkádusfitnodagas NTB:i.
– Kristiandsándas, Lyngdalas ja Oslos lea garra dálki bilidan robiid go beazit mat leat gaikkehuvvon ruohttasis ja gahččan viesuid njeaiga. Garra dálki lea maid bilidan sihke biillaid ja fatnasiid, dadjá Høvig.
Bergen guovllus leat fas ollu sajiin čáhci vahágahttán ja álddagas lea časkán ja bilidan máŋgga sajis.
Alla buhtadus logut
Buhtadusat viesuide, barttaide ja stohpogálvvuide leat lassánan measta 25 proseanttain dán rádjái dán jagi go buohtastahttá diimmáš ektui. Dát leat erenoamáš stuorra logut.
Ovdal go čakčastoarpmat álge, de ledje jo dáhkádusfitnodagat ožžon sisa eanet go 170.000 dieđu bilidemiid birra ja leat máksán 4,4 miljárdda ruvnnu buhtadusa oktiibuot, čájehit Finans Norge logut. Gaskamearálaš bilideamit vuosttas jahkebealis ledje 25.000 ruvnnu.
