-Almmuhus-
OĐĐASAT– Garra bargu bálkkaša

– Garra bargu bálkkaša

-

-

Kárášjoga Bargiidbellodat oaččui 41,5 proseantta vuosttaš jienain mat almmuhuvvojedje diibmu 21:00 ja dat illudahttá sátnejođiheaddjievttohasa.

Badjelaš diibmu 21:00 álmmuhedje vuosttaš lohkkojuvvon ovddalgihtii jienat, go 20 proseantta leat lohkkon. Bargiidbellodat oaččui 41,5 proseantta, go Guovddášbellodat oaččui 30,1 proseantta ja Kárášjot’lista oaččui 8,8 proseantta.

 

Loktanii riedja
Bargiidbellodaga sátnejođiheaddjievttohas Svein Atle Somby váldui bures vuostá iežas válgakafeas, gos loktanii riedja go vuosttaš bohtosat álmmuhuvvojedje.
– Mii leat geassit jo álgán bargat ja mun jáhkkan ahte mii leat olahan olbmuide. Mus lea hui buorre dovdu dál go birget. Mii soaitit mannat ain vulos, muhto mun lean hui duhtavaš. Dát diehttelas addá gal stuorra doaivaga, muhto 80 proseantta jienain galgá ain lohkkot, dadjá Somby dakka maŋŋel bohtosiid almmuheami.

 

Váiban, muhto movtta

Somby dovddasta iežas veahá váiban justa dál ja oaidná dan seammá iežas bellodatustibiin, garra válggasteami maŋŋel.

 – De leige hui somá oažžut dákkár buori ođđasa, mii fas movttiidahttá. Mii leat bargan hui garrasit, dainna mihttuin ahte galgat vuoitit dáid válggaid. Ja dá lea bálkkašupmi garra barggus, dovddasta son.

Bargiidbellodagas lea válgakáfea DnB guovddážis, muhto áigot sirdit Šáldi Márkan kafeai go válgagohccin álgá.

 – Dál áiggun veahá čohkkedit ja ráfodit, ovdal go čusket válgagohcimii, dadjá movttegis Somby.

 

 

-Almmuhus-