Gáregasnjárgga kapealla ođđa eaiggát lea vuovdimin kapealla čuorvvungávppis.
Lapin Kansa -aviisa muitala Gáregasnjárgga boares kapealla lea vuovdimassii neahttačuorvungávppis, čállá Yle Sápmi. Ohcejoga searvegoddi vuvddii kapealla árabut báikkálaš fitnodatdoallái 650 euroin dahje 6.185 Norgga kruvdnii. Dál fitnodatdoalli lea vuovdimin boares kapealla neahtas 220 000 euroin dahje 2.094.070 Norgga kruvdnii.
Čuorvungávpi boares kapeallas nohká 9.8.
Ohcejoga searvegoddi vuvddii boares kapealla ekonomalaš sivaid geažil. Searvegotti ekonomalaš váttisvuođat leat šaddan das go Gáregasnjárgga ođđa kapealla huksen šattai divrasabbon go álggos lei plánejuvvon.
Sárgon ođđa kapealla
Ávvir čálii jagi 2011 ahte kapealla ceggejuvvui Gáregasnjárgii 1966:s ja viiddiduvvui 1977:s, lea nu heajos ortnegis dál ahte ii gánnát dan divvugoahtit, lohke dalle 2011s.
Ylivieskalaš arkiteakta Jorma Paloranta leage dál sárgon ođđa kapealla mii galgá leat 281 njealjehasmehtera ja galgá čuožžut dálá kapealla ja hávdeeatnama davábealde.
Ohcejoga searvegoddi ozai doarjaga ođđa kapealla huksemii girkoráđđehusas 1 075 000 euro, mas 43 000 euro lea rehkenaston viessogálvvuide ja áltára čiŋahuvvomii 15 000 euro. Girkoráđđehus meannudii 738 600 euro doarjaga dan plánii mannan golggotmánus.
Dát lea stuorámus doarjja maid girkoráđđehus lea goassege addán Ohcejohkii, dás báhcá vel badjelaš 300 000 váilut, logai Antero Isola jagi 2011s.
