-Almmuhus-
OĐĐASATGára­savvon skuvllas gávdnon korona 

Gára­savvon skuvllas gávdnon korona 

-

-

Rektor duođašta ahte ovtta olbmos Gárasavvon skuvllas lea duođaštuvvon korona. 

– Mun in oaččo muitalit lea go sáhka min bargiin dehe ohppiin. Muhto mis lea ovtta olbmos duođaštuvvon korona. Mii leat dieđihan váhnemiidda ja ohppiide ahte dáppe lea korona duođaštuvvon.  Váhnemat fertejit dál bearráigeahččat ožžot go mánát dávdamearkkaid, čilge Gárasavvon skuvlla rektor Nils Vasara Hammare. 

Ruovttuskuvla

Dat lea sáhka Girona gieldda skuvllas mas leat oahppit ovdaskuvllas gitta ovccát luohkkái. Gárasavvon skuvlla rektor Nils Vasara Hammare dadjá ahte sii leat mearridan odne sáddet čihččet, gávccat ja ovccát luohkáid ohppiid ruoktot.

– Mis leat olu oahpaheaddjit eret skuvllas ja danin mii leat mearridan ahte oahppit lohket ruovttus dán vahku. Dat mearrádus bistá dušše dan vahku, ja de mii oaidnit maid mii ovddos guvlui mearridit, čilge Vasara Hammare. 

Sáhttá rievdat

Ovdaskuvllas ja gitta guđát luohkkái lea oahpahus nu go dábálaččat skuvllas, nu go dilli lea odne, muhto dat sáhttá rievdat maid, čilge Gárasavvon skuvlla rektor Nils Vasara Hammare.

– Mus lea oktavuohta leamaš Regiovdna Norrbotteniin ja lean ožžon rávvagiid, čilge Vasara Hammare. 

Lea go sáhka giddet skuvlla?

– Dan in dieđe vel, juste dán dilis leat mearridan ahte čihččet gitta ovccát luohká oahppit barget ruovttus dán vahku. De ferte oaidnit mot ovddos guvlui šaddá, čilge son.

-Almmuhus-