Gánnáhahtti čiŋahit sápmelaččaid

Čigŋás sápmelaččaid lea gánnáhahtti čiŋahit. Dan čájehit sámi duodje- design- ja silbačeahppifitnodagaid eaiggádiid ja jođiheddjiid dietnasat. Dienasnjunnošis lea Maritex Gávppi eaiggát, Inger Marit Bongo, gii diibmá dinii 1.6 miljovnna ruvnno. Son heittii fásta virggis suohkanis ja válddii badjelassii eatnis duodjegávppi jagi 2002:s

Dat lei Inger Marit Bongo eadni gii álggahii Maritex gávppi, ja go su eadni buohcagođii jagi 2002:s, de lohpidii Bongo ahte son jođiha gávppi dassái eadni dearvvasmuvvá.

Su eadni ii dearvvasmuvvan iige ceavzán. Nu heittiige Inger Marit Bongo sihkkaris fásta barggus suohkanis ja válddii de badjelássii jođihit gávppi.  

– Lean rievtti mielde oahppan sirdoinšenevran ja ledjen danin barggus suohkanis, mii lea oalle guhkkin eret duojis, lohká son.

Birge go gille bargat
Bongo čilge ahte son dine earret eará duodjegávppiin, ja dine earáládje maid.

Muhto son lohká dujiin gal sáhttá birget bures go gille bargat:

– Mun jáhkán juohke diŋggain sáhttá dinet bures go doaimmaha barggu ja gille bargat, ja jáhkán dáppe livčče ollu vejolašvuođat, lohká son.

Gávpeguovddáš
Son muitala kundarat leat lassánan ja vuohttá ahte maiddái olggobealde olbmot bohtet gávppašit Guovdageidnui.

– Guovdageaidnu lea šaddan guovddášbaikin čiŋaide ja duodjái, ja kundarat lávejit muitalit ahte sii vulget gávppašanmátkái Guovdageidnui, go dáppe leat máŋga duodje- ja čikŋagávppi, ja dáppe lea maid buorre válljenvárri. Vaikko máŋgga dáfus lea Guovdageaidnu doaresbealbáiki, de lea čiŋaiguin ja dujiin guovddášbáiki, lohká Bongo.

Olaha viidábut
Bongo lea maid viiddidan gávppi ja álggahan neahttagávppi.
– Ii heive dieđusge buohkaide vuolgit fitnat Guovdageidnui gávppašanmátkái, ja de lea dán áigge neahttagávpi hui anolaš reaidu ja dainna maid olaha dobbelii márkaniidda, lohká son. 

Sámi duodje- design- ja silbačeahppefitnodagaid eaiggádiid ja jođiheddjiid logut: