Finnmárkku fylkkalávdegoddi válljii disdaga orrunmovtta bálkkašumi vuoiti.
Finnmárkku fylkkalávdegoddi válljii disdaga orrunmovtta bálkkašumi vuoiti.
Gáŋgaviikka eaktodáhtolašguovddáš vuittii Finnmárkku fylkkagieldda orrunmovtta bálkkašumi.
Guovddáš lea nagodan jorgalahttit ovdáneami vaikko ii soaitte álki leamaš, leat lágidan olu aktivitehtaid, sihke mánáide, nuoraide ja vuorrasiidda.
Bálkkašupmi geigejuvvo fylkkadikkis golggotmánu 25. beaivvi.
Rámpo
Gáŋgaviikka sátnejođiheaddji lea duhtavaš.
– Lean mearehis ilus go Gáŋgaviika eaktodáhtolašguovddáš oaččui bálkkašumi, ja lean hui rámis barggus maid barget. Guovddáš ánssáša bálkkašumi, lohká Trond Einar Olaussen. Son lea maid eaktodáhtolašguovddáža stivrajođiheaddji.
Orrunmovtta bálkkašupmi juolluduvvo searvái mii bargá buoridit orrunmovtta, buori beaggima ja mii dagaha báikkiid ja suohkaniid Finnmárkkus geasuheaddjin.
Buori beaggima
Gáŋgaviika eaktodáhtolašguovddáš lágida olu doaimmaid. Nammadeamis bohtet ovdán olu dat doaimmat.
– Bargu maid dát olbmot barget, dagahit ahte Gáŋgaviika ássit šaddet rápmás go ásset Gáŋgaviikas, ja dagaha ahte buoridit suohkana beaggima go rámpojit suohkana go leat eará báikkiin mátkkošteame, čuožžu nammadeamis.
Gávcci evttohasa
Finnmárkku fylkkagielda juohká bálkkašumi juohke jagi. Bálkkašupmi sáhttá juolluduvvot joavkkuide, servviide, institušuvnnaide, organisašuvnnaide dahje ovttaskas olbmuide fylkkas. Gudni ja rápmi lea vuoitun, 30 000 ruvnno ja vel dáidda.
Dán jagi ledje gávcci evttohasas. Sørøyrocken, Wenche Heiberg, Gáŋgaviika eaktodáhtolašguovddáš, Sædis/Albert Eggertson, Keaisvági gili- ja valáštallansearvi, Sievjju mánáidfestivála, Jernteppet ja Ođđa ruvkegávpoga olbmát/Guovžajávrri orrunmokta.
