Ođđa guorahallan man Mediabearráigeahčču lea čađahan, čájeha ahte lea áibbas dábálaš ahte mánát ja nuorat golahit ruđaid spealuide.
Guđas juohke logát nuoras guhte «game», dahje speallá, geavaha ruđaid spealuide.
– Lea álki geavahit menddo olu ruđa, nu ahte lea buorre jus váhnemat čuvvot mánáid speallanvieruid, ávžžuha Mediabearráigeahču direktevra Mari Velsand preassadieđáhusas.
Mediabearráigeahču guorahallan čájeha ahte maŋemuš guovtti jagis ii leat spelliid lohku olu lassánan ja man olu ruđa geavahit daid iešguđet spealuide.
– Dihtorspealut leat dehálaččat ja positiivvalaš doaimmat olu mánáide ja nuoraide, muhto lea dehálaš ahte váhnemat čuvvot mielde dan dihte go olu spealut ávžžuhit oastit eambbo. Mii ávžžuhit maid váhnemiid hállat mánáiguin makkár váikkuhusat oastimis sáhttet leat, ja šaddat ovttaoaivilii man olu ruđa mánát sáhttet geavahit, čilge Velsand.
Gánddat geavahit eambbo ruđa
Mediabearráigeahču guorahallan čájeha ahte leat sakka eambbo gánddat geat ostet spealuin, go dan maid nieiddat dahket. Mađi boarraset gánddat leat, dađi eambbo ruđa sii geavahit.
Sin gaskkas geat speallet de lea guđas juohke logát gánddas muitalan ahte sii dihtet maid sii ostet, nieiddain ges lea guovttis juohke logát nieiddas geat dihtet maid ostet.
36 proseanta gánddain ges leat oastán ja eai leat diehtán maid leat oastán, nieiddain ges lea 6 proseanta oastán juoidá maid eai leat diehtán mii lea.
– Muhtin spealuin lea vejolaš oastit «imašpáhkaid», ja de ii beasa diehtit maid oastá ovdal lea jo máksán gálvvu ovddas. Dát dagaha ahte sáhttá vajálduhttit man olu ruđa geavaha diŋggaide. Dan dihte berrejit váhnemat geahččat nuoraid speallanvearuid, ja hállat singuin. Sáhttá leat vuogas bidjat váhnendárkkisteami nu ahte mánát eai beasa vaikke man olu ruđa bidjat spealuide, muitala Velsand.
