Veahkaválddálaš dihtorspealut eai dagat ahte nuorat šaddet eanet veahkaválddálačča, muhto nieiddažiidda váikkuha sosiálalaččat, čájeha ođđa dutkanraporta mii lea dahkkon badjelaš 3000 nuorain Singaporas.
Gaskamearálaš ahkki nuorain geat oassálastte dutkamis lei 11,2 jagi ja birrasii 72 proseantta dáin ledje gánddat, čállá NRK.
Dutkan lea guorahallan oktavuođa gaskkal olu dihtorspeallama, main lea veahkaválddálaš sisdoallu, ja vejolaš aggresiiva bohtosa guokte jagi maŋŋel, čállá NTB.
Unnán váikkuhus
Leat máŋga dutkama mat guorahallet dán čuolmma muitala seniordutki Beate W. Hygen NTNU servodatdutkamis.
Jus dattege suhttu váikkuhuvvo veahkaválddálaš spealuin, de orru dás unnán váikkuhus dadjá Hygen.
Dihtorspealut rievdan
Hygen dadjá dutkan dábálaččat geahčada negatiivva váikkuhusaid dihtorspeallamis ja ahte lea dárbu dássedis geahčestagas dutkat dán fáttá.
Seniordutki dadjá dihtorspealuid leat rievdan nu ahte leat eambbo kompleaksa, iešguđetláganat, realisttalaččat ja sosiálat go ovdal.
Su mielas lea dehálaš guorahallat sihke positiivvalaš ja negatiivvalaš váikkuhusaid speallamis.
Olu speallan váikkuha nieiddažiidda
NTB čállá Hygena dahkan guorahallama gos lea geahččan oktavuođa gaskkal man olu áiggi leat geavahan dihtorspeallamii ja mánáid sosiála gelbbolašvuođa.
Dát dutkan čájeha ahte gánddaid dihtospeallan ii váikkut sin sosiála gelbbolašvuhtii.
Nieiddažiin lei dattege erohus. Čájehuvvui ahte nieiddažiin geat spellet olu 10-jahkásažžan, lea heajut sosiála gelbbolašvuohta 12-jahkásažžan, dadjá seniordutki.
