Galloga ruvkedoaimmas ii vuos šatta mihkkege, go Ruoŧa eiseválddit leat mearridan álggahit ášši áibbas álggus.
Mannan geasi galggai Ruoŧa ráđđehus dahkat mearrádusa galgá go Beowulf Mining beassat álgit ruvkedoaimma Gállogis, Johkamohki olggobeale, vai ii.
Sii válljejedje sáddet ášši ruovttoluotta, nu ahte Beowulf šaddet áibbas ođđa ohcamuša sáddet fas Bergstatenii, mii Ruoŧas mearrida ruvkeáššin. Dan čállá Norrlanska Socialdemokraterne (NSD) neahttaaviissas.
Duopmu bissehii
Lei Ruoŧa Alimus hálddahusduopmostuolus celkon duopmu mii bissehii Ruoŧa eiseválddiid dahkamis mearrádusa áššis.
Duopmu lea celkon eará áššis Lulli-Ruoŧas, Vattern guovllus, gos daddjui ahte ii sáhte dušše árvvoštallat váikkuhusaid báikkis gos ruvke galgá álggahuvvot.
Guovlluváikkuhusat
Duomus celkui ahte ferte árvvoštallat váikkuhusaid olles guovllus, ja dan vuođul easka árvvoštallat lea go jierpmálaš ásahit ruvkedoaimma.
Gálloga oktavuođas dat mielddisbuktá ahte fertejit váldit mielde váikkuhusaid mat Johkamohkis lea juo, ovdal go ruvke álggahuvvo, ja Johkamohki suohkanis leat earret eará eanemus dulvadeamit olles Ruoŧas.
