-Almmuhus-
-Almmuhus-
OĐĐASAT Galledii terrorbáikki veahá ovdal go bávkkehii

Galledii terrorbáikki veahá ovdal go bávkkehii

-

-

Johan Mikkel Bongo lea dál Manchesteris gos terrordáhpáhus lei ikte. Son ja su olbmát áigot dál doalahallat veahá olggobealde gávpotguovddáža, várrogasvuođain.

Guovdageaidnulaš Johan Mikkel Bongo lea dál Manchesteris. Son muitala doppe leat alitčuovggat biillat ja helikopterat girdet gávpoga bajábeale. 

Son ja su olbmát eai áiggo odne gal vuolgit gosa ge.

– Minguin manná bures, eat mii lean ballán. Odne gal eat soaitte gal gillet mannat gosage. Mii orrut veahá olggobealde gávpotguovddáža, jáhkán jus mii vuolgit gosage, de mii mannat Old Trafforda geahččame, mii ii leat guovddážis. Jáhkán gávpotguovddážis lea oalle moivi dál, lohká Bongo.

 

Terror konseartavisttis

Mánnodaga eahkes lei terrordáhpáhus Manchesteris Stuorra-Británnias, gos okta iešsorbmenbombejeaddji bávkalii bombba Manchester Arena konsearavisttis.

Disdaga čielggai ahte unnimusat 22 olbmo jápme ja 59 olbmo roasmmehuvve dáhpáhusas.

Disdaga gaskabeaivveáigge bođii diehtu ahte leat evakueren muhtun gávpeguovddáža Manchester gávpogis, dan sivas go ledje gullan bávkkanasa. Ii mannan nu guhká ovdal go fas rahpe gávpeguovddáža.

 

Fitne Manchester Arenas ovdalaš go bávkkehii

Bongo muitala sii ledje árabut seamma beaivvi fitnan Manchester Arena vistti geahččame. 

Dalle ledje konseartamannit čuožžume ráiddus ja vuordime beassat sisa konsertii, man maŋŋil bomba bávkkehii. 

Bongo ja su olbmát ledje áigon geahččat arena, muhto eai beassan sisa go doppe ledje ráhkkaneame konsertii. 

Sii ledje vuolgán Manchester gávpogii geahččat go Manchester United spábbačiekčanjoavku čievččai maŋemuš ligačiekčamiid Crystal Palace vuostá. Dat čiekčan lei sotnabeaivvi. 

– Olmmoš veahá jurddaša de, čiekčamis ledje birrasii 70 000 olbmo, ja dan konsearttas ledje 20 000 olbmo. Smiehtasta de veahá. Muhto Old Traffordas lei gal hui buorre sihkarvuohta, sii iske buohkaid geat sisa manne, muitala Johan Mikkel Bongo.

 

Eai gullan ge bávkkanasa

Sii leat njealjis geat leat vuolgán spábbačiekčamiid geahččat Manchester gávpogii. Johan Mikkel Bongo, su vielja, vilbealli ja neahpi.

Sii ledje juste činus geahččame filmma go terrordáhpáhus geavai. Sii eai gullan dáhpáhusa birra ovdal go filbma nogai. Neahtas ledje goit ge lohkan dáhpáhusa birra, ovdal go ollejedje olggos činuvisttis.

– Dat ii orron duohta. Olmmoš jurdila veahá go dákkár dáhpáhusat gevvet. Ledjen ovdal juovllaid maid Parisas, ja olmmoš de jurdila ahte dákkár báikkiin sáhttá leat terror, muhto go duođas dáhpáhuvvá, de ii oro duohta, lohká son.

– Mu nieida jearai mus de maŋŋil eat go mii gullan bávkkanasa, muhto eat mii činus gullan gos nu riedja ja reaškkas lei, muitala son.

 

Vuolgán finála geahččat

Ihttin čiekčá sin joavku Manchester United ligafinála Ajax joavkku vuostá. Sis lei jurdda vuolgit muhtun báikái gos stuorašearpmas čájehit čiekčama.

Dál eai dieđe šat nu sihkkarit galget go vuolgit dakkár báikái gosa olu olbmot čoahkkanit.

– Eat mii leat nu jierrásat, muhto fertet digaštallat maid mii dál dahkat. Soitet olu sajiin čájehit čiekčama, mii veahá geahččat vuolgit go stuora báikái, lohká son.

Sii galget Manchesteris leahkit bearjadahkii. Ovdal go vulget, soitet fitnat geahččame báikki gos terrordáhpáhus lei, muhto dál vuos orrot gos leat, oarjjabealde gávpotguovddáža.

– Dáppe sihkkarit šaddet čalmmusteamit, oaidnit ahte stádaministtar boahtá. Olles gávpogii šaddá ártegis vuoigŋa go diekkár dáhpáhusat gevvet. Leimmet jurddašan jus Manchester United vuoitá ihttin, de beassat ávvudit vuoittu. Eat dál šat dieđe movt dát dáhpáhus váikkuha, lohká Bongo.

- Advertisement -
-Almmuhus-