«Two odysseys: Pimoteewin/Gállábártnit» operačájálmas vuittii stuora Kanada bálkkašumi.
Operačájálmas «Two odysseys: Pimoteewin/Gállábártnit» lei ožžon olles njeallje nominašuvnna stuora Kanada bálkkášumis, Dora Mavor Moore Awards – buoremus bagadallama, buoremus neaktinbarggu ja buoremus lávlaga kategoriijain, oktan «outstanding new opera», masa sámi operabihttá «Gállábártnit» lei nominerejuvvon.
Ovddit ija geigejuvvojedje bálkkášumit, mas boađusin lei ahte operačájálmas vuittii «Outstanding Performance by an Ensemble» bálkkašumi – buoremus neaktinbarggu ovddas.
Internašunála ovttasbargu
Operačájálmas lea internašunála Beaivváš Sámi našunálateahtera, Soundstreams ja Signal Theatre ovttasbargu, mas vuođđun leat guokte operabihttá – sámi «Gállábártnit» operabihttá ja cree operabihttá «Pimoteewin». 2012:s, go cree-bihtás lei vuosttaščájálmas, válddii Soundstreams oktavuođa Rawdna Carita Eirain go ohce čálli gii sáhtášii hukset operabihtá sámi kultuvrra birra mii heive cree-opera bihttái.
– Barggaime olu ovttas komponisttain Britta Byströmain go ráhkadišgođiime operabihtá, ja vuosttaš álgoevttohus lei gárvvis 2014:s. Manaime Kanadai iskan dihte doibmet go lávlagat, maiguin leimme bargan, dán ovttasbargui, ja máhttet go lávlut sámegiel lávlagiid. Liikojedje operabihttái, ja doaimmai bures ovttas «Pimoteewin» operabihtáin. Mun lean doaibman čállin ja giellakonsuleantan dán ovttasbarggus, muitalii Eira Ávvirii go ođas nominašuvnnaid birra bođii.
